لاہور: مناواں کے علاقے میں کچرے کے ڈھیر سے ملنے والی خاتون اور بچے کی لاشوں کی شناخت کر لی گئی ہے۔
پولیس کے مطابق مقتولہ اور بچہ ماں بیٹے ہیں۔ خاتون کی شناخت سونیا اور بچے کی شناخت حمزہ کے نام سے ہوئی۔مقتولہ کے بھائی کی مدعیت میں پولیس نے قتل کا مقدمہ درج کر لیا ہے۔ ابتدائی تحقیقات کے مطابق خاتون اپنے بھائی کے گھر کے قریب، جوڑے پل کے علاقے میں رہائش پذیر تھی۔ ایف آئی آر میں بتایا گیا ہے کہ خاتون گھر سے سودا سلف لینے گئی تھی اور واپس نہ آئی۔ نامعلوم ملزم نے خاتون اور اس کے بیٹے کو قتل کر کے لاشیں کچرے کے ڈھیر پر پھینک دی تھیں۔
پولیس نے لاشوں کو قبضے میں لے کر شواہد اکٹھے کیے ہیں اور تحقیقات جاری ہیں۔ حکام کا کہنا ہے کہ جلد ہی قاتل یا قاتلین کو گرفتار کر کے مقدمے کی مزید تفصیلات سامنے لائی جائیں گی۔واضح رہے کہ یہ لاشیں گزشتہ روز مناواں کی ڈمپنگ سائٹ سے برآمد ہوئی تھیں، جہاں شہریوں کی اطلاع پر پولیس نے پہنچ کر تحقیقات شروع کی تھیں۔
