چیف آف آرمی اسٹاف جنرل سید عاصم منیر نے برطانیہ میں منعقدہ عالمی سطح کی "کیمبرین پیٹرول مشق" میں گولڈ میڈل حاصل کرنے والی پاک فوج کی ٹیم کو مبارکباد دی۔
آئی ایس پی آر کے مطابق، یہ مشق 4 سے 13 اکتوبر 2024 تک برطانیہ کے مڈ ویلز علاقے میں ہوئی، جو دنیا کی سب سے مشکل فوجی مشقوں میں شمار کی جاتی ہے۔اس مشق میں 143 بین الاقوامی فوجی ٹیموں نے حصہ لیا اور پاک فوج کی ٹیم نے غیر معمولی مہارت اور عزم کا مظاہرہ کرتے ہوئے چھٹی بار یہ اعزاز حاصل کیا۔ آرمی چیف جنرل عاصم منیر نے ٹیم کی شاندار کارکردگی کو سراہا اور ان کی جیت کو پاکستان کا عالمی سطح پر نام روشن کرنے کے طور پر تسلیم کیا۔
کیمبرین پیٹرول مشق ایک انتہائی مشکل اور چیلنجنگ فوجی مقابلہ ہے جو مڈ ویلز کے سخت پہاڑی علاقوں میں منعقد کی جاتی ہے۔ اس میں جسمانی طاقت، حکمت عملی، ذہنی پختگی اور ٹیم ورک کو پرکھا جاتا ہے۔ یہ مشق فوجیوں کی قیادت، خود نظم و ضبط، جرات اور سخت آپریشنل حالات میں عزم کو جانچنے کا بہترین معیار سمجھی جاتی ہے۔ اس کامیابی کے بعد پاک فوج کی ٹیم نے ایک بار پھر دنیا کے سامنے اپنی غیر معمولی صلاحیتوں کا مظاہرہ کیا ہے۔
