کوئٹہ کے کمشنر محمد حمزہ شفقات نے میڈیا سے گفتگو کرتے ہوئے کہا کہ آج صبح کوئٹہ ریلوے اسٹیشن پر ہونے والا دھماکا خودکش حملہ تھا، جس میں ایک خودکش بمبار سامان کے ساتھ اسٹیشن میں داخل ہوا تھا۔ انہوں نے کہا کہ ایسے حملوں کو روکنا انتہائی مشکل ہے کیونکہ خودکش حملہ آوروں کو روکنے کے لیے کوئی خاص طریقہ کار نہیں ہوتا۔
دھماکے کی ذمے داری کالعدم تنظیم نے قبول کی ہے، جو کہ ایک سنگین تشویش کا باعث ہے۔کمشنر نے مزید کہا کہ خودکش بمبار اسٹیشن کے کھلے داخلی راستوں سے داخل ہوا تھا، جس کے باعث اسے چیک کرنے کا کوئی امکان نہیں تھا۔ انہوں نے یہ بھی کہا کہ دھماکے کے بعد اسپتالوں میں خون کی کمی کے حوالے سے عوام سے اپیل کی کہ وہ خون عطیہ کرنے کے لیے اسپتال جائیں تاکہ زخمیوں کی زندگی بچائی جا سکے۔محمد حمزہ شفقات نے کہا کہ دہشت گرد ہمیشہ سافٹ ٹارگٹ کو نشانہ بناتے ہیں، اور اس دھماکے میں بھی معصوم شہریوں کو نشانہ بنایا گیا۔ انہوں نے اس بات کا بھی ذکر کیا کہ دھماکے میں جاں بحق ہونے والوں کی تعداد 25 تک پہنچ گئی ہے، اور 40 سے زائد افراد زخمی ہوئے ہیں، جنہیں فوری طور پر طبی امداد دی جا رہی ہے۔
دھماکے کے فوراً بعد سکیورٹی فورسز نے علاقے کو گھیرے میں لے لیا اور تحقیقات کا آغاز کر دیا ہے تاکہ حملے میں ملوث افراد کا سراغ لگایا جا سکے۔
