بالی ووڈ کے فلم ساز وکرم بھٹ اور ان کی اہلیہ شیوتمباری بھٹ کو راجستھان پولیس نے 30 کروڑ روپے کے فراڈ کیس میں گرفتار کر لیا ہے۔
پولیس کے مطابق، دونوں کو 7 دسمبر 2025 کو ممبئی سے گرفتار کیا گیا اور پھر ادے پور منتقل کیا گیا۔ یہ گرفتاری ایک ایف آئی آر کے بعد عمل میں آئی، جو ڈاکٹر اجے مرڈیا نے 17 نومبر 2025 کو درج کرائی تھی۔ ایف آئی آر میں الزام عائد کیا گیا کہ وکرم بھٹ اور ان کے ساتھیوں نے ڈاکٹر مرڈیا سے سرمایہ کاری کے نام پر دھوکہ کیا اور وعدوں کے مطابق فلم منصوبہ کو حقیقت میں بدلنے میں ناکام رہے۔اس کیس میں وکرم بھٹ اور شیوتمباری کے علاوہ پانچ دیگر افراد بھی گرفتار کیے گئے ہیں۔ ابتدائی تفتیش سے معلوم ہوا ہے کہ وکرم بھٹ نے ڈاکٹر مرڈیا کو اپنی مرحومہ بیوی کی زندگی پر بننے والی بایوپک فلم کا وعدہ کیا تھا، جس کے لیے مرڈیا نے 30 کروڑ روپے کی سرمایہ کاری کی۔میڈیا رپورٹس کے مطابق، ڈاکٹر مرڈیا کا دعویٰ ہے کہ انہیں وعدہ کیا گیا تھا کہ اس فلم سے 200 کروڑ روپے تک کا منافع ہوگا، مگر منصوبہ کبھی عملی جامہ نہ پہنا سکا، جس کے بعد انہوں نے فراڈ کی شکایت درج کرائی۔
پولیس کا کہنا ہے کہ، 2024 کے مئی میں مرڈیا اور بھٹ خاندان کے درمیان 4 فلموں کی تیاری کا معاہدہ ہوا تھا، جس کی مجموعی مالیت 47 کروڑ روپے تھی۔ ابتدائی دو منصوبے مکمل ہوگئے، مگر باقی فلمیں بن نہیں سکیں۔ تفتیش سے یہ بھی سامنے آیا ہے کہ جعلی وینڈرز کے نام پر فرضی بل اور مبالغہ آمیز دستاویزات تیار کرکے رقم نکالی گئی، جس کے نتیجے میں مرڈیا کو تقریباً 30 کروڑ روپے کا مالی نقصان اٹھانا پڑا۔وکرم بھٹ اور شیوتمباری کے وکلاء نے الزام عائد کیا ہے کہ ان کی گرفتاری قانونی قواعد کے خلاف کی گئی اور دباؤ ڈال کر بغیر مناسب اجازت کے دستخط کرائے گئے۔ انہوں نے یہ بھی کہا کہ ان کی گرفتاری غیر قانونی تھی۔عدالت نے دونوں فریقین کے دلائل سننے کے بعد وکرم بھٹ اور ان کی اہلیہ کا ٹرانزٹ ریمانڈ 9 دسمبر تک منظور کر لیا ہے۔
