پشاور زلمی کے کپتان بابر اعظم نے پی ایس ایل 11 کے دوسرے مرحلے کے آغاز پر حیدرآباد کنگز کے خلاف جیت کے بعد میڈیا سے بات کرتے ہوئے کہا کہ وہ مداحوں کی توقعات پر پورا اترنے کے لیے بھرپور کوشش کر رہے ہیں، لیکن نتائج فوراً سامنے نہیں آتے۔
بابر اعظم نے بتایا کہ میچ کے دوران پچ آسان نہیں تھی اور بیٹرز کو مشکلات کا سامنا کرنا پڑا، تاہم ٹیم کی جیت میں افتخار احمد کی آل راؤنڈ پرفارمنس نے اہم کردار ادا کیا۔ انہوں نے کہا کہ افتخار احمد کے تجربے اور کارکردگی سے ٹیم کو فائدہ ہوا اور وہ ہمیشہ کھلاڑیوں کے لیے مثال ہیں۔کپتان نے امید ظاہر کی کہ آئندہ حالات بہتر ہوں گے اور تماشائی دوبارہ میچز دیکھنے کے قابل ہوں گے۔دوسری جانب، حیدرآباد کنگز کے ہیڈ کوچ جیسن گلیسپی نے تسلیم کیا کہ ان کی بیٹنگ لائن مسلسل ناکام رہی ہے اور اس میں بہتری کی ضرورت ہے۔ انہوں نے کہا کہ بولنگ اچھی رہی، لیکن بیٹنگ میں کارکردگی کا فقدان رہا۔ صائم ایوب اور گلین میکسویل جیسے کھلاڑی جلد فارم میں آ کر ٹیم کو مضبوط کریں گے۔یہ جیت پشاور زلمی کے لیے حوصلہ افزا ہے اور ٹیم کی کارکردگی میں استحکام لانے کی امید بڑھاتی ہے۔
