پاکستان پیپلز پارٹی کی رہنما شیری رحمٰن نے آٹا اور سبزیاں مہنگی بیچنے والوں کے خلاف سخت کارروائی کا مطالبہ کیا ہے۔
انہوں نے ایک بیان میں کہا کہ ذخیرہ اندوز اور منافع خور عوام کی مشکلات سے فائدہ اٹھا رہے ہیں، اور ایسے عناصر کے خلاف فوری اور سخت کارروائی کی جانی چاہیے۔شیری رحمٰن کا کہنا ہے کہ ہزاروں لوگ سیلاب کی تباہ کاریوں سے متاثر ہو چکے ہیں اور ان کی مشکلات بڑھانے کے لیے آٹے اور سبزیوں کی مصنوعی قیمتوں میں اضافہ غریب عوام کے لیے ظلم ہے۔ ان کا کہنا ہے کہ آٹے کی قیمتوں میں اضافہ مافیا کا ایک کھیل ہے جسے بے نقاب کرنے کی ضرورت ہے۔انہوں نے حکومت پر زور دیا کہ وہ منافع خوروں اور ذخیرہ اندوزوں کے خلاف فوری کارروائی کرے، آٹے کی قیمتوں پر کنٹرول رکھے اور سیلاب متاثرین کو سستا آٹا فراہم کرے۔
شیری رحمٰن نے یہ بھی مطالبہ کیا کہ سیلاب سے متاثرہ علاقوں میں فوری سبسڈی دی جائے اور آٹے کی بلا رکاوٹ فراہمی یقینی بنائی جائے۔ ان کا کہنا ہے کہ آٹے کی قیمتوں میں بے تحاشا اضافے سے خوراک کا بحران پیدا ہو سکتا ہے، جو کہ متاثرہ علاقوں کے لوگوں کے لیے سنگین مسئلہ ہے۔انہوں نے مزید کہا کہ عوام آٹے کے لیے ترس رہے ہیں اور حکومت کو چاہیے کہ وہ مداخلت کرے اور آٹے کی فراہمی کو یقینی بنائے تاکہ غریب اور متاثرہ عوام کو بنیادی ضرورت کی اشیاء دستیاب ہوں۔
