بھارت کے دارالحکومت دہلی اور این سی آر (نیشنل کیپٹل ریجن) کے کئی اسکولوں کو ایک بار پھر بم کی دھمکیاں موصول ہوئی ہیں۔
بم کی دھمکیاں اور ردعمل
بھارتی میڈیا کے مطابق، نوئیڈا کے متعدد اسکولوں کو آج صبح بم دھماکے کی دھمکیاں ملیں، جبکہ مایور وہار کے ایک اسکول کو ای میل کے ذریعے دھمکی دی گئی۔ ان دھمکیوں کے بعد اسکولوں نے فوری طور پر حفاظتی اقدامات کیے اور تمام طلبہ کو واپس گھروں کو بھیج دیا گیا۔
ماضی میں بھی دھمکیاں مل چکی ہیں
یہ پہلا موقع نہیں کہ دہلی کے اسکولوں کو بم دھمکیاں دی گئی ہیں۔ اس سے قبل بھی ایسے واقعات پیش آ چکے ہیں، جنہوں نے والدین، طلبہ اور اسکول انتظامیہ میں خوف و ہراس پھیلایا تھا۔
طالب علم کی دھمکی آمیز ای میل
گزشتہ واقعات میں، دہلی کے ایک اسکول کو دھمکی آمیز ای میل بھیجنے کے الزام میں ایک 12 سالہ طالب علم کو گرفتار کیا گیا تھا۔ تاہم، بعد میں پولیس نے کونسلنگ کے بعد اسے والدین کی تحویل میں دے دیا اور انہیں متنبہ کیا گیا۔بھارتی میڈیا کے مطابق، مذکورہ اسکول ان 30 اداروں میں شامل تھا جنہیں حالیہ دنوں میں دھمکیاں موصول ہوئی تھیں۔ پولیس نے تحقیقات کا آغاز کر دیا ہے اور ان دھمکیوں کے پیچھے موجود عناصر کا سراغ لگانے کی کوشش کی جا رہی ہے۔
