عازمین حج کیلئے کرایوں میں اضافہ نہیں کیا جائے گا ، سردار یوسف

 اس سال مجموعی طور پر 1لاکھ 79ہزار 210عازمین حج ادا کریں گے 
اسلام آباد(خصوصی رپورٹ )وزیر برائے مذہبی امور سردار یوسف نے کہا ہے کہ عالمی سطح پر تیل کی قیمتوں میں اضافے کے باوجود پاکستانی عازمین حج کیلئے کرایوں میں اضافہ نہیں کیا جائے گا۔ بیان کے مطابق وزیر مذہبی امور نے کہا ہے کہ حکومت پاکستان نے ایئرلائنز کے ساتھ معاہدہ کیا ہے، جس کے تحت طے شدہ پیکیج کے مطابق ہی عازمین کو سعودی عرب لے جایا جائے گا۔ انہوں نے مزید کہا کہ اس معاہدے کے تحت ایئرلائنز پابند ہیں کہ حج پیکیج میں کوئی اضافہ نہ کیا جائے، اس لیے کرایوں میں اضافہ نہیں ہو گا۔سردار یوسف نے بتایا کہ پاکستان سے اس سال مجموعی طور پر 1 لاکھ 79 ہزار 210 عازمین حج ادا کریں گے۔