7دن میں 780منشیات فروش گرفتار

 1428 چھاپے مارے گئے، 335کلو چرس، 38کلو آئس ،37کلو ہیروئن، 33ہزار 619لٹر شراب بر آمد 
لاہور (کرائم رپورٹر) پنجاب کو ڈرگ فری بنانے کے حوالے سے گزشتہ ایک ہفتے کے دوران لاہور سمیت صوبہ بھر میں منشیات فروشوں کے ٹھکانوں پر 1428 چھاپے مارے گئے جس کے نتیجے میں 780منشیات فروش گرفتار ہوئے۔ترجمان پنجاب پولیس کے مطابق منشیات فروشوں کے قبضہ سے 335کلو چرس، 38کلو آئس ،37کلو ہیروئن، 33ہزار 619لٹر شراب و دیگر منشیات بر آمد کی گئی۔ترجمان نے بتایا کہ آئی جی پنجاب ڈاکٹر عثمان انورنے منشیات ڈیلرز و سمگلرز کے خلاف سپیشل آپریشنز جاری رکھنے کا حکم دیاہے اور کہا کہ تعلیمی اداروں اور ہاسٹلز کے گرد انٹیلی جنس بیسڈ آپریشنز میں مزید تیزی لائی جائے۔ انہوں نے منشیات کی سپلائی چین کے خاتمے اور آن لائن خرید و فروخت میں ملوث ملزموں کی فوری گرفتاری یقینی بنانے کی ہدایت کی ہے۔