سیکورٹی فورسز نے خوارج کی موجودگی کی اطلاع پر ڈیرہ اسماعیل خان کے علاقے تکواڑہ میں ایک انٹیلی جنس بیسڈ آپریشن کیا۔
اس آپریشن کے دوران 9 خوارج مارے گئے، جن میں سرکردہ خارجی لیڈر شیریں بھی شامل تھا۔آئی ایس پی آر کے مطابق، شیریں دہشت گردی کی متعدد کارروائیوں میں ملوث تھا اور وہ قانون نافذ کرنے والے اداروں کے لیے انتہائی مطلوب تھا۔ شیریں نہ صرف متعدد بے گناہ شہریوں کی ٹارگٹ کلنگ میں ملوث تھا بلکہ وہ 20 مارچ کو شہید ہونے والے کیپٹن حسنین اختر کی شہادت کا بھی ذمہ دار تھا۔آپریشن کے دوران مارے گئے خوارج سے اسلحہ اور گولہ بارود بھی برآمد کیا گیا، جس سے یہ ظاہر ہوتا ہے کہ یہ گروہ دہشت گردی کے منصوبوں میں ملوث تھا۔ آپریشن کے بعد علاقے میں سینیٹائزیشن آپریشن بھی کیا گیا تاکہ کسی بھی ممکنہ خارجی کو مکمل طور پر ختم کیا جا سکے۔آئی ایس پی آر نے واضح کیا کہ سیکیورٹی فورسز دہشت گردی کے خاتمے کے لیے اپنے عزم کو مزید مضبوط کر رہی ہیں اور ان دہشت گرد عناصر کا قلع قمع کرنے کے لیے کارروائیاں جاری رکھیں گی۔ اس آپریشن کے ذریعے گھناؤنے جرائم کے بدلے میں مرکزی مجرم کو انصاف کے کٹہرے میں لایا گیا ہے اور سیکیورٹی فورسز کی کوششیں ملک میں امن و سکون قائم کرنے کے لیے جاری ہیں۔
