لاہور اور کراچی میں موسم کے بدلتے ہوئے حالات کے پیش نظر شہریوں کے لیے اہم اطلاع جاری کی گئی ہے۔
لاہور میں موسم سرد ہونے لگا ہے، فضا میں خنکی کا احساس بڑھ گیا ہے۔ صوبائی دارالحکومت سمیت پنجاب بھر میں سموگ کی شدت میں کمی دیکھی جا رہی ہے، جس سے فضائی معیار میں بہتری کی توقع ہے۔ لاہور کا کم سے کم درجہ حرارت 12 ڈگری سینٹی گریڈ جبکہ زیادہ سے زیادہ 26 ڈگری سینٹی گریڈ تک جانے کا امکان ہے، اس وقت درجہ حرارت 17 ڈگری سینٹی گریڈ ہے۔ ہوا کی رفتار 8 کلومیٹر فی گھنٹہ ریکارڈ کی گئی ہے، اور بادل برسنے کے امکانات نہیں ہیں۔ ایئر کوالٹی انڈیکس 185 ہے، جس میں مختلف علاقوں جیسے گلبرگ، برکی روڈ اور ڈی ایچ اے میں کچھ اضافہ بھی دیکھا گیا ہے۔ ماہرین نے شہریوں کو غیر ضروری گھریلو باہر نکلنے سے گریز اور ماسک کا استعمال کرنے کی ہدایت کی ہے۔
دریں اثنا، کراچی میں بھی موسم خشک اور جزوی طور پر ابرآلود رہنے کی توقع ہے۔ شہر کا موجودہ درجہ حرارت 23 ڈگری سینٹی گریڈ ہے، ہوا کی سمت شمال مشرق سے ہے اور رفتار 5 کلومیٹر فی گھنٹہ ہے۔ ہوا میں نمی کا تناسب 25 فیصد ہے۔ کراچی دنیا کے آلودہ ترین شہروں میں ساتویں نمبر پر اور پاکستان میں پانچویں نمبر پر ہے، جہاں ہوا میں ذرات کی مقدار 178 پرٹی کیولیٹ میٹر ہے۔ محکمہ موسمیات کے مطابق، جنوبی پنجاب میں بھی موسم خشک ہے، ملتان میں درجہ حرارت 20 سے 27 ڈگری سینٹی گریڈ کے درمیان رہنے کا امکان ہے۔ آئندہ ہفتے سردی میں مزید اضافے کا امکان ہے۔
فضائی آلودگی کے حوالے سے، ہواؤں کا رخ شمال مغرب سے جنوب مشرق کی طرف ہے، جس سے لاہور اور مشرقی پنجاب سے آلودہ ہوا باہر جا رہی ہے۔ ہوا کی اوسط رفتار 7 سے 14 کلومیٹر فی گھنٹہ ہے، اور دوپہر کے اوقات میں اس میں معمولی اضافہ ہو سکتا ہے۔ فیصل آباد اور ساہیوال میں فضائی معیار معتدل ہے، جبکہ ملتان اور بہاولپور میں آلودگی میں اضافہ کا خدشہ ہے۔ اس تناظر میں، محکمہ ماحولیات اور ضلعی انتظامیہ نے صنعتی سرگرمیوں اور فصلوں کی باقیات جلانے کی نگرانی سخت کر دی ہے۔ پنجاب حکومت نے ’’کلین ایئر ایکشن پلان‘‘ کے تحت سموگ کی نگرانی کے لیے روزانہ شہر وار مانیٹرنگ اور فوری ردعمل یونٹس فعال کر دیے ہیں۔
سینئر صوبائی وزیر مریم اورنگزیب نے عوام سے اپیل کی ہے کہ غیر ضروری سفر سے گریز کریں، ماسک کا استعمال یقینی بنائیں، اور بچوں اور بزرگوں کو صبح و شام کھلی فضا میں جانے سے روکیں۔ محکمہ صحت نے شہریوں کو ہدایت دی ہے کہ اگر گلے، آنکھوں میں خارش، سانس لینے میں دشواری یا کھانسی جیسی علامات ظاہر ہوں تو فوراً قریبی ہسپتال یا کلینک سے رجوع کریں۔
