پرتگال کے عالمی شہرت یافتہ فٹبالر اور کپتان کریستیانو رونالڈو نے تصدیق کی ہے کہ فیفا ورلڈ کپ 2026 ان کے بین الاقوامی کیریئر کا آخری عالمی ٹورنامنٹ ہوگا۔
41 سالہ اسٹار نے یہ اعلان اسپین کے خلاف پری کوارٹر فائنل سے قبل میڈیا سے گفتگو کے دوران کیا۔رونالڈو نے کہا کہ وہ اس ٹورنامنٹ کے ہر لمحے سے بھرپور لطف اٹھا رہے ہیں اور چاہتے ہیں کہ ان کا آخری ورلڈ کپ یادگار ثابت ہو۔ ان کے مطابق فٹبال نے انہیں سب کچھ دیا ہے اور وہ اپنے ملک پرتگال کی نمائندگی پر فخر محسوس کرتے ہیں۔انہوں نے واضح کیا کہ بین الاقوامی فٹبال سے ریٹائرمنٹ کا فیصلہ وہ خود کریں گے اور یہ کسی دباؤ یا بیرونی فیصلے کے تحت نہیں ہوگا۔ رونالڈو کا کہنا تھا کہ جب وہ یہ مرحلہ ختم کریں گے تو ذہنی طور پر مطمئن ہوں گے کہ انہوں نے اپنے ملک اور کھیل کے لیے اپنی پوری صلاحیتیں وقف کیں۔اس ورلڈ کپ میں رونالڈو کی کارکردگی بھی نمایاں رہی ہے۔ وہ اب تک تین گول اسکور کر چکے ہیں۔ گروپ مرحلے میں ازبکستان کے خلاف دو گول کے ساتھ وہ چھ مختلف ورلڈ کپ ایڈیشنز میں گول کرنے والے پہلے کھلاڑی بھی بن گئے۔
اس کے علاوہ کروشیا کے خلاف ناک آؤٹ میچ میں پنالٹی کے ذریعے انہوں نے اپنے ورلڈ کپ ناک آؤٹ کیریئر کا پہلا گول بھی اسکور کیا۔رونالڈو نے کہا کہ یہ ورلڈ کپ ان کے لیے جذباتی طور پر سب سے خاص ہے اور وہ اسے اپنی یادگار ترین مہم سمجھتے ہیں۔ انہوں نے تنقید کے حوالے سے بات کرتے ہوئے کہا کہ دباؤ اور تنقید نے انہیں کمزور نہیں کیا بلکہ مزید مضبوط بنایا ہے اور ہر تجربہ انہیں بہتر کھلاڑی اور بہتر انسان بنانے میں مددگار ثابت ہوا ہے۔فٹبال ماہرین کے مطابق رونالڈو کا یہ اعلان ایک دور کے اختتام کی علامت ہے، کیونکہ وہ گزشتہ دو دہائیوں سے عالمی فٹبال کا اہم ترین نام رہے ہیں اور ان کی موجودگی نے پرتگال کو مسلسل بڑے ٹورنامنٹس میں مضبوط بنایا ہے۔
