ویب ڈیسک: عالمی فیشن انڈسٹری کے عظیم نام اور لگژری برانڈ ارمانی کے بانی، معروف اطالوی ڈیزائنر جورجیو ارمانی 91 برس کی عمر میں انتقال کر گئے۔
ان کے انتقال کی تصدیق 4 ستمبر کو ارمانی گروپ نے انسٹاگرام پر ایک بیان کے ذریعے کی۔بیان میں کہا گیا کہ ارمانی اپنے آخری ایام تک اپنے کام سے جڑے رہے اور اپنے پیاروں کے درمیان پُرسکون انداز میں اس دنیا سے رخصت ہوئے۔ کمپنی نے بتایا کہ وہ نئے کلیکشنز اور آئندہ منصوبوں پر آخری وقت تک سرگرم رہے۔ ان کی آخری رسومات 6 ستمبر کو نجی طور پر ادا کی جائیں گی۔
فیشن سفر اور کامیابیاں
1975 میں جورجیو ارمانی نے اپنے نام سے برانڈ متعارف کرایا۔ ابتدا میں یہ مردانہ لباس کے ایک محدود مجموعے پر مشتمل تھا لیکن جلد ہی یہ برانڈ ایک عالمی فیشن سلطنت میں تبدیل ہو گیا۔ آج یہ برانڈ نہ صرف کپڑوں بلکہ جوتوں اور دیگر لگژری مصنوعات کے باعث بھی دنیا بھر میں مقبول ہے۔ارمانی کو جدید اطالوی فیشن کا نمائندہ مانا جاتا تھا۔ انہوں نے اپنی تخلیقی صلاحیتوں کو کامیاب کاروباری حکمتِ عملی کے ساتھ جوڑ کر ایک ایسی کمپنی قائم کی جو آج سالانہ تقریباً 2.3 بلین یورو کا کاروبار کرتی ہے۔ وہ سادگی اور نفاست کو فیشن کی دنیا میں ایک نئی شناخت دینے کے باعث ہمیشہ یاد رکھے جائیں گے۔
صحت اور آخری ایام
کچھ عرصے سے علیل رہنے کی وجہ سے وہ جون میں میلان مینز فیشن ویک میں اپنے برانڈ کے شوز میں شریک نہ ہو سکے۔ یہ ان کے طویل کیریئر کا پہلا موقع تھا کہ وہ اپنے برانڈ کے شو سے غیر حاضر رہے۔جورجیو ارمانی کے انتقال پر دنیا بھر سے تعزیتی پیغامات کا سلسلہ جاری ہے اور فیشن انڈسٹری نے انہیں اپنی تاریخ کے سب سے بڑے آئیکونز میں سے ایک قرار دیا ہے۔
