بھارت کے ضلع نواپور میں برڈ فلو کے تیزی سے پھیلاؤ کے بعد ہنگامی اقدامات کیے گئے ہیں۔
مقامی انتظامیہ نے فوری طور پر چکن، انڈوں اور متعلقہ اشیاء کی فروخت پر پابندی عائد کردی ہے تاکہ وائرس کے مزید پھیلاؤ کو روکا جا سکے۔ اس فیصلے کے سبب شہریوں اور پولٹری انڈسٹری سے وابستہ افراد میں شدید تشویش پائی جا رہی ہے۔رپورٹس کے مطابق صرف دو دن کے دوران تقریباً 44,000 پرندوں کو تلف کیا جا چکا ہے، اور ایک لاکھ 40 ہزار مرغیوں کو ہلاک کرنے کا عمل جاری ہے۔ حکام کا کہنا ہے کہ وائرس کے پھیلاؤ کو روکنے کے لیے یہ ہنگامی اقدامات ناگزیر تھے۔ شہر بھر کے چکن شاپس، بریانی سینٹرز اور انڈوں کی فروخت پر مکمل پابندی عائد کر دی گئی ہے، اور خلاف ورزی کرنے والوں کے خلاف سخت قانونی کارروائی کا عندیہ دیا گیا ہے۔اس بحران کا اثر مقامی معیشت پر بھی پڑ رہا ہے، جہاں اندازہ ہے کہ پولٹری صنعت کو یومیہ تقریباً 50 لاکھ روپے کا نقصان ہو رہا ہے۔
اس کے علاوہ، تقریباً 20 ہزار انڈے اور 44 ٹن جانوروں کا چارہ ضائع ہو چکا ہے۔ کاروباری طبقہ اور روزگار سے وابستہ افراد شدید پریشانی کا شکار ہیں۔انتظامیہ نے عوام سے اپیل کی ہے کہ وہ افواہوں سے بچیں اور احتیاطی تدابیر اختیار کریں۔ حکام کا دعویٰ ہے کہ صورتحال پر قابو پانے کے لیے تمام وسائل بروئے کار لائے جا رہے ہیں، مگر شہریوں کے تعاون کو بھی خصوصی اہمیت دی جا رہی ہے۔ اس مشکل وقت میں صحت اور صفائی کے اقدامات کو اپنانا بے حد ضروری ہے، تاکہ وائرس کے پھیلاؤ کو موثر طریقے سے روکا جا سکے۔
