بھارتی فٹبال شائقین کے لیے مایوس کن خبر یہ ہے کہ لیونل میسی اور ارجنٹائن کی قومی فٹبال ٹیم کا رواں سال کیرالہ کا دورہ منسوخ کردیا گیا ہے۔
وزیر کھیل کی تصدیق
کیرالہ کے وزیر کھیل وی عبد الرحمان نے پیر کے روز باضابطہ اعلان کرتے ہوئے کہا کہ میسی کی قیادت میں ارجنٹائن ٹیم کا متوقع دورہ بھارت اب ممکن نہیں رہا۔ یہ خبر ان لاکھوں بھارتی شائقین کے لیے صدمے کا باعث بنی ہے جو برسوں سے میسی کو اپنے ملک میں کھیلتے دیکھنے کے خواہاں تھے۔
اسپانسرز کی ادائیگی اور دورہ منسوخی
وزیر کھیل کے مطابق، پہلے حکومت نے اعلان کیا تھا کہ میسی کی قیادت میں ارجنٹائن ٹیم کا دورہ کیرالہ طے پایا ہے اور اسپانسرز کی جانب سے میچ فیس بھی ادا کردی گئی تھی۔ تاہم اب غیر ملکی ٹیم نے اطلاع دی ہے کہ وہ اکتوبر میں بھارت آنے سے قاصر ہے۔عبد الرحمان نے بتایا کہ اسپانسرز نے بھی واضح کر دیا کہ ان کی دلچسپی صرف اکتوبر کے دورے تک محدود تھی، جس کے بعد معاملہ ختم ہوگیا۔
شائقین کے خواب مؤخر
اس سے قبل وزیر کھیل نے کہا تھا کہ ارجنٹائن ٹیم کا اکتوبر یا نومبر میں دورہ متوقع ہے اور ٹیم کو ریاستی مہمان کے طور پر خوش آمدید کہا جائے گا، جہاں حکومت کی جانب سے مکمل سکیورٹی، رہائش اور دیگر سہولیات فراہم کی جائیں گی۔ تاہم اب بھارتی شائقین کو لیونل میسی کو اپنے ملک میں کھیلتا دیکھنے کے لیے مزید انتظار کرنا پڑے گا۔
