ویب ڈیسک:بھارتی ریاست کیرالہ کے وزیر کھیل عبدالرحمان نے ایک پریس کانفرنس کے دوران دعویٰ کیا ہے کہ ارجنٹائن کے معروف فٹبالر لیونل میسی اگلے سال اپنی ٹیم کے ہمراہ بھارت کا دورہ کر سکتے ہیں۔
وزیر کھیل کا کہنا تھا کہ ارجنٹائن کی قومی فٹبال ٹیم، جو 2022 کے فیفا ورلڈ کپ کی فاتح ہے، کیرالہ میں ایک انٹرنیشنل میچ کھیلے گی، جس کے تمام انتظامات ریاستی حکومت کرے گی۔یہ دورہ بھارت کے لیے ایک اہم موقع ہو گا کیونکہ اگر میسی بھارت آتے ہیں تو یہ ان کا دوسرا دورہ ہو گا۔ ان کا پہلا دورہ ستمبر 2011 میں ہوا تھا، جب ارجنٹائن نے فیفا کے دوستانہ میچ میں وینزویلا کے خلاف بھارت میں کھیلنے کا فیصلہ کیا تھا۔ اس میچ میں ارجنٹائن نے 1-0 سے کامیابی حاصل کی تھی، اور اس میں لیونل میسی کی اہم پرفارمنس تھی، جنہوں نے نکولس اوٹامینڈی کے ساتھ مل کر یہ فتح حاصل کی تھی۔اس دورے کا اعلان ایک ایسے وقت میں کیا گیا ہے جب دنیا بھر میں فٹبال کے شائقین ارجنٹائن اور میسی کے کھیل کے منتظر ہیں، اور بھارت میں انٹرنیشنل میچوں کے لیے اس قسم کی بڑی ٹیموں کی آمد سے مقامی فٹبال کی ترقی اور شائقین کی دلچسپی میں اضافہ ہو سکتا ہے۔ وزیر عبدالرحمان نے کہا کہ یہ میچ کیرالہ کے فٹبال کے فروغ کے لیے ایک بڑی پیشرفت ہو گا اور حکومت کی طرف سے اس کے لیے تمام انتظامات کیے جائیں گے۔
