بھارت کی ریاست اتر پردیش کے شہر آگرہ میں ایک خاتون کو اپنے شوہر کے مبینہ قتل اور لاش گھر کے باتھ روم میں دفن کرنے کے الزام میں گرفتار کر لیا گیا ہے۔
بھارتی میڈیا کے مطابق مقتول سریندر شرما گزشتہ 45 روز سے لاپتہ تھے۔ ان کی گمشدگی کی رپورٹ بھی ان کی اہلیہ روبی نے ہی پولیس کو درج کرائی تھی۔رپورٹس کے مطابق تفتیش کے دوران ملزمہ پولیس کے ساتھ اپنے شوہر کی تلاش کا ڈرامہ کرتی رہی، جبکہ اہلِ محلہ کے سامنے بھی خود کو غم زدہ ظاہر کرتی رہی۔پولیس کو اس کیس میں اس وقت اہم پیش رفت ملی جب مقتول کے بھائی نے روبی کے بیانات پر شکوک و شبہات کا اظہار کیا، جس کے بعد تفتیش کا رخ تبدیل کیا گیا۔پولیس کے مطابق سخت پوچھ گچھ کے دوران ملزمہ کے مبینہ انکشافات کی بنیاد پر مزدوروں کی مدد سے گھر کے باتھ روم کا فرش توڑا گیا، جہاں سے سریندر شرما کی لاش برآمد ہوئی۔پولیس کا کہنا ہے کہ واقعے کی مزید تحقیقات جاری ہیں تاکہ یہ معلوم کیا جا سکے کہ قتل اور لاش چھپانے میں کوئی اور شخص بھی ملوث تھا یا نہیں۔واضح رہے کہ ملزمہ کے خلاف الزامات زیرِ تفتیش ہیں، جبکہ مقدمے کا حتمی فیصلہ عدالت کی کارروائی کے بعد ہوگا۔
