کراچی میں دو خواتین کی پراسرار ہلاکتوں کے واقعات سامنے آئے ہیں، جن میں ایک خاتون کی لاش نجی ہوٹل سے برآمد ہوئی، جب کہ دوسری خاتون کی لاش لیاری کے علاقے سے ملی۔
پولیس کے مطابق، شاہراہ فیصل پر واقع نجی ہوٹل کے کمرے سے 35 سالہ ارم زوجہ عادل کی برہنہ لاش برآمد ہوئی۔ خاتون کو گلے پر تیز دھار آلے سے وار کرکے قتل کیا گیا۔ پولیس کو ہوٹل کی انتظامیہ سے اطلاع ملی کہ کمرے میں چیخ و پکار اور لڑائی جھگڑے کی آوازیں آئیں، جس کے بعد پولیس فوراً جائے وقوعہ پر پہنچی۔ وہاں انہیں خاتون کی لاش ملی، جب کہ ملزم شوہر عادل جائے وقوعہ سے فرار ہوگیا تھا۔ پولیس کے مطابق، مقتولہ ارم چنیسر گوٹھ کی رہائشی اور 3 بچوں کی ماں تھی۔ شوہر عادل کے بارے میں بتایا گیا کہ وہ پیشے سے قصاب ہے اور واردات کے بعد سے فرار ہے۔ ابتدائی تفتیش کے مطابق، عادل نے گوشت کی دکان سے چھری خریدی اور اسی چھری سے اپنی بیوی کا قتل کیا۔
پولیس نے آلہ قتل کو تحویل میں لے لیا ہے اور ملزم کی گرفتاری کے لیے چھاپے مارے ہیں، لیکن ابھی تک وہ گرفتار نہیں ہو سکا۔دوسری جانب، لیاری کے علاقے اولڈ کمہار واڑہ کے قریب نیپیئر تھانے کی حدود میں 30 سالہ لمیلا کی پھندا لگی لاش برآمد ہوئی۔ ریسکیو حکام نے خاتون کی شناخت لمیلا کے نام سے کی ہے۔ ابتدائی تحقیقات کے مطابق، یہ واقعہ گھریلو ناچاکی کی وجہ سے خود کشی کا نتیجہ ہو سکتا ہے، تاہم پولیس نے مزید تفتیش شروع کر دی ہے۔ خاتون کی لاش کو سول اسپتال منتقل کیا گیا ہے تاکہ ضابطے کی کارروائی کی جا سکے۔دونوں واقعات کی تحقیقات جاری ہیں اور پولیس ملزمان کی گرفتاری کے لیے مختلف مقامات پر چھاپے مار رہی ہے۔
