پاکستان اسٹاک ایکسچینج (PSX) میں کاروباری ہفتے کے آخری دن بھی تیزی کا رجحان غالب رہا، اور مارکیٹ نے ایک بار پھر نئی بلندی کو چھو لیا۔
جمعہ کے روز کے ایس ای 100 انڈیکس میں 484 پوائنٹس کی تیزی دیکھی گئی، جس کے بعد انڈیکس ایک لاکھ 31 ہزار 479 پوائنٹس کی نئی بلند ترین سطح پر پہنچ گیا۔کاروبار کے آغاز پر ہی مارکیٹ میں مثبت رجحان دیکھنے کو ملا، اور ابتدائی 253 پوائنٹس کے اضافے سے انڈیکس ایک لاکھ 30 ہزار 940 پوائنٹس کی سطح پر آ گیا۔ اس کے بعد دن کے پہلے سیشن کے اختتام تک تیزی برقرار رہی اور مارکیٹ مزید 484 پوائنٹس کے اضافے کے ساتھ ایک لاکھ 31 ہزار 171 پوائنٹس تک جا پہنچی۔مارکیٹ میں سرمایہ کاروں کا اعتماد بحال رہا اور مختلف شعبوں میں بھرپور خریداری دیکھی گئی، جس کے نتیجے میں انڈیکس کاروبار کے دوران ایک موقع پر ایک لاکھ 31 ہزار 479 پوائنٹس کی نئی ریکارڈ سطح پر بھی ٹریڈ کرتا رہا۔
یہ بات قابلِ ذکر ہے کہ گزشتہ روز بھی پاکستان اسٹاک ایکسچینج میں شاندار تیزی کا رجحان رہا، جہاں 100 انڈیکس نے پہلی مرتبہ ایک لاکھ 31 ہزار پوائنٹس کی تاریخی حد عبور کی تھی، جو ملکی معیشت میں استحکام، سیاسی صورتحال میں بہتری، اور کاروباری اعتماد میں اضافے کی علامت قرار دیا جا رہا ہے۔ماہرینِ معاشیات کے مطابق مالیاتی پالیسی میں تسلسل، روپے کی قدر میں استحکام، اور بیرونی سرمایہ کاری کے امکانات میں بہتری مارکیٹ کی اس مسلسل تیزی کے بڑے عوامل میں شامل ہیں۔ اگر یہی رجحان برقرار رہا تو آنے والے دنوں میں مارکیٹ نئی بلندیوں کو چھو سکتی ہے۔
