وزیراعلیٰ پنجاب مریم نواز نے بسنت فیسٹیول کے موقع پر 7 فروری کو لاہور کے لبرٹی چوک میں خصوصی جشن منانے کا اعلان کیا ہے۔
مریم نواز نے اپنے سوشل میڈیا اکاؤنٹ ایکس (سابقہ ٹویٹر) پر پیغام جاری کرتے ہوئے شہریوں کو دعوت دی کہ وہ اس ثقافتی تقریب میں شرکت کریں اور بسنت کی خوشیوں کو بھرپور انداز میں منائیں۔وزیراعلیٰ کے مطابق جشن کے دوران پنجاب کی ثقافت کو اجاگر کرنے کے لیے مختلف سرگرمیوں کا اہتمام کیا جائے گا۔ اس کے ساتھ ہی شہریوں کی سہولت اور حفاظت کے لیے سیکیورٹی اور ٹریفک کے خصوصی انتظامات بھی کیے جا رہے ہیں۔مریم نواز نے کہا کہ بسنت پنجاب کی ایک خوبصورت روایت ہے اور حکومت کی کوشش ہے کہ اسے محفوظ، منظم اور خوشیوں بھرا بنایا جائے۔
انہوں نے بسنت کے حوالے سے مشہور گانا ’’گڈی لہور دی اڈی‘‘ بھی شیئر کیا، جسے سوشل میڈیا پر عوامی پذیرائی حاصل ہو رہی ہے۔ وزیراعلیٰ نے مزید کہا کہ یہ جشن خوشیوں، رنگوں اور ثقافتی ہم آہنگی کی علامت ہے اور حکومت پنجاب عوام کے ساتھ مل کر اس موقع کو یادگار بنانا چاہتی ہے۔
