پنجاب،24 پرائمری سٹروک سنٹر30جون تک فعال کرنیکا ہدف

فنکشنل 15 پرائمری سٹروک سنٹر میں 700 فالج زدہ مریضو ں کو انجکشن لگائے 
مریم نواز کی ہدایت پر ایڈوائزری کمیٹی قائم، سلمان رفیق سربراہ، قاسم بشیرکنوینر
لاہور(کرائم رپورٹر)وزیراعلیٰ مریم نوازنے سی ایم سٹروک پروگرام فیز ون کے تحت صوبہ بھر میں مزید 24 پرائمری سٹروک سنٹر 30جون تک فنکشنل کرنے کا ہدف مقررکردیا،پرائمری  سٹروک سنٹر میں نیورالوجسٹ اور نیوروسرجن تعینات کیے جائیں گے، پرائمری سٹروک سنٹرز میں فالج زدہ مریضوں کے فوری علاج کے لئے ڈاکٹرز کی خصوصی ٹریننگ بھی مکمل کر لی گئی ، وزیراعلیٰ کی زیر صدارت خصوصی اجلاس میں سی ایم سٹروک مینجمنٹ پروگرام کے بارے میں تفصیلی رپورٹ پیش کی گئی،رپورٹ میں بتایا گیا کہ پنجاب میں فنکشنل 15 پرائمری سٹروک سنٹر میں 700 فالج زدہ مریضو ں کو انجکشن لگائے گئے اوروہ زندگی بھر کی معذوری سے بچ گئے، لاہور سروسزہسپتال، میو،گنگا رام اور پنز(جنرل ہسپتال)سٹروک مینجمنٹ سنٹرسروسز فراہم کررہے ہیں ،بہاولپور، ڈی جی خان، فیصل آباد، گوجرانوالہ، ملتان، نارووال، رحیم یارخان، راولپنڈی، سیالکوٹ، بھکر اور لیہ میں بھی پرائمری سٹروک سنٹر فنکشنل ہیں ،پرائمری سٹروک سنٹر کو قریبی نیورالوجی سنٹر سے منسلک کیا جائے گا،پرائمری سٹروک سنٹر میں فالج زدہ مریضوں کے لئے’’سپیشل سٹروک بے‘‘ قائم کیا جائے گا،سی ایم سٹروک کے تحت لاہور کے چار، فیصل آباد اور ملتان کے تین، راولپنڈی کے دو ہسپتالوں میں پرائمری سٹروک سنٹر قائم ہوں گے،اجلاس میں بتایا گیا کہ گجرات، سرگودھا، ساہیوال، بہاولپور، وہاڑی،جہلم، قصور، منڈی بہاوالدین، شیخوپورہ، ٹی ٹی سنگھ اور خانیوال میں بھی پرائمری سٹروک سنٹر بنیں گے،وزیراعلیٰ مریم نواز شریف نے پرائمری سٹروک سنٹر فیز ٹو کے تحت مزید17 شہرشامل کرنے کی منظوری دے دی،چکوال، پاکپتن، مظفرگڑھ، راجن پور، میانوالی، بہاولنگر، حافظ آباد، چنیوٹ اور لودھراں میں فیز ٹو میں پرائمری سٹروک سنٹر بنیں گے-پرائمری سٹروک سنٹر فیز ٹو میں خوشاب، اوکاڑہ، اٹک، ننکانہ صاحب،وزیر آباد، مری، کوٹ ادو اور تلہ گنگ شامل ہے- پنجاب میں چار مزید مکینکل تھرومبکٹامی سنٹرز (نیورو سرجری وغیرہ کے لئے جامع سٹروک سنٹر) بنانے کی منظوری دے دی-پنز لاہور اور آر آئی سی راولپنڈی میں کمپری ہنسیو سٹروک سنٹر فنکشنل، رحیم یار خان اور دیگر چار شہروں میں بھی جلد فنکشنل ہوں گے-ہولی فیملی راولپنڈی، الائیڈ ہسپتال فیصل آباد، نشتر ہسپتال ملتان اور بی وی ایچ بہاولپور میں سٹروک سنٹر بنیں گے- وزیراعلیٰ مریم نواز شریف کی ہدایت پر سی ایم سٹروک پروگرام کیلئے ایڈوائزری کمیٹی قائم کر دی گئی،سی ایم سٹروک پروگرام کے لئے 12رکنی ایڈوائزری کمیٹی کی سربراہی خواجہ سلمان رفیق کریں گے-سی ایم سٹروک پروگرام کے ایڈوائزری کمیٹی کے پروفیسر قاسم بشیرکنوینر مقررکر دئیے گئے۔دریں اثنا مریم نواز نے بنوں میں خودکش حملے میں معصوم شہریوں کو نشانہ بنانے کی شدید مذمت کی اور فیصل آباد میں لفٹ گرنے سے تین مزدوروں کے جاں بحق ہونے پر اظہار افسوس کرتے ہوئے رپورٹ طلب کرلی۔