لاہور کے چیئرنگ کراس پر جماعت اسلامی کی جانب سے پٹرولیم مصنوعات پر عائد پٹرولیم لیوی کے خلاف جاری دھرنا 19ویں روز میں داخل ہوگیا ہے۔
دھرنے میں جماعت اسلامی کے کارکنان کی بڑی تعداد مسلسل موجود ہے، جبکہ آئندہ احتجاجی ریلی کے لیے بھی تیاریاں مکمل کی جا رہی ہیں۔جماعت اسلامی نے پٹرولیم لیوی کے خاتمے کے مطالبے کے حق میں لاہور میں بڑی احتجاجی ریلی نکالنے کا اعلان کر رکھا ہے۔ اس سلسلے میں دھرنے کے مقام پر موجود کارکنان کو ریلی میں بھرپور شرکت کے لیے منظم کیا جا رہا ہے، جبکہ مختلف علاقوں سے کارکنان کی شرکت یقینی بنانے کے لیے رابطے بھی جاری ہیں۔جماعت اسلامی کے رہنماؤں کا کہنا ہے کہ پٹرولیم مصنوعات پر عائد لیوی عوام پر اضافی مالی بوجھ ہے، جس کے باعث مہنگائی میں اضافہ ہو رہا ہے۔ جماعت اسلامی نے حکومت سے مطالبہ کیا ہے کہ پٹرولیم لیوی کا خاتمہ کیا جائے اور عوام کو پٹرولیم مصنوعات کی قیمتوں میں ریلیف فراہم کیا جائے۔امیر جماعت اسلامی ضیاء الدین انصاری نے کہا ہے کہ پٹرولیم لیوی کے خاتمے تک احتجاج کا سلسلہ جاری رکھا جائے گا۔ انہوں نے کہا کہ جماعت اسلامی عوام کے حقوق کے لیے اپنی جدوجہد سے پیچھے نہیں ہٹے گی اور مطالبات کی منظوری تک احتجاج جاری رہے گا۔
ضیاء الدین انصاری نے مزید کہا کہ جماعت اسلامی پورے لاہور میں ہڑتال کرے گی۔ ان کا کہنا تھا کہ ہڑتال کے دوران دکانداروں سے درخواست کی جائے گی کہ وہ اپنی دکانیں بند کرکے احتجاج میں جماعت اسلامی کا ساتھ دیں۔جماعت اسلامی کے مطابق احتجاج کا مقصد حکومت پر پٹرولیم لیوی کے خاتمے کے لیے دباؤ بڑھانا اور عوام کو درپیش مہنگائی کے خلاف آواز بلند کرنا ہے۔ پارٹی قیادت نے کارکنان کو آئندہ احتجاجی سرگرمیوں میں بھرپور شرکت کی ہدایت کی ہے۔چیئرنگ کراس پر جاری دھرنے کے باعث جماعت اسلامی کے کارکنان میں احتجاج کا سلسلہ بدستور جاری ہے، جبکہ آئندہ دنوں میں لاہور میں احتجاجی سرگرمیوں کو مزید وسعت دینے کا عندیہ بھی دیا گیا ہے۔
