خیبر پختونخوا: سکیورٹی فورسز نے 30 اپریل اور یکم مئی کو خیبر پختونخوا کے مختلف علاقوں میں خوارج کے خلاف تین الگ الگ کارروائیاں کیں، جس کے نتیجے میں 5 خوارج ہلاک اور 2 گرفتار کر لیے گئے۔
باجوڑ ضلع میں خفیہ اطلاعات کی بنیاد پر سکیورٹی فورسز نے آپریشن کیا، جہاں انہوں نے خوارج کے ایک اہم ٹھکانے کو نشانہ بنایا۔ اس آپریشن کے دوران شدید فائرنگ کا تبادلہ ہوا جس کے نتیجے میں تین خوارج مارے گئے، جن میں ایک اہم ہدف فرید اللہ بھی شامل تھا، جو ایک اعلیٰ سطح کا خارجی تھا۔شمالی وزیرستان کے علاقے دوسالی میں بھی ایک اور خفیہ آپریشن کیا گیا، جہاں سکیورٹی فورسز کے ساتھ فائرنگ کے تبادلے میں دو خوارج کو ہلاک کر دیا گیا۔تیسری کارروائی مہمند ضلع میں کی گئی، جہاں سکیورٹی فورسز نے ایک خارجی ٹھکانے پر چھاپہ مارا اور 2 خوارج کو گرفتار کر لیا۔ گرفتار ہونے والوں میں ہائی لیول خارجی لال امیر عرف ابراہیم بھی شامل ہے۔
پاک فوج کے ترجمان کے مطابق، ان کارروائیوں کے دوران بھاری مقدار میں اسلحہ، گولہ بارود اور دھماکہ خیز مواد بھی برآمد کیا گیا۔ مارے گئے اور گرفتار خوارج مختلف دہشت گردی کی سرگرمیوں میں ملوث رہے تھے۔ ترجمان نے مزید کہا کہ علاقے میں کلیئرنس آپریشن جاری ہے تاکہ باقی ماندہ خوارج کو بھی گرفتار یا ہلاک کیا جا سکے۔پاک فوج نے دہشت گردی کے خاتمے کے لیے اپنی جدوجہد جاری رکھنے کا عزم ظاہر کیا اور کہا کہ ملک کو اس ناسور سے مکمل نجات دلانے کے لیے ہر ممکن اقدام کیا جائے گا۔
