پاکستان کی معروف میزبان اور اداکارہ جویریہ سعود نے اپنے مداحوں کو ایک نیا انداز اور سفر شروع کرنے کا اعلان کیا ہے، جس سے سوشل میڈیا پر صارفین کی نظریں ان پر جمی ہوئی ہیں۔
انسٹاگرام پر شیئر کی گئی اپنی تصاویر میں جویریہ سعود نے حجاب پہنا ہوا تھا، جس کے ساتھ ہی انہوں نے اپنے نئے سفر کا آغاز کیا۔جویریہ سعود نے اپنے انسٹاپوسٹ میں لکھا، "بسم اللّٰہ، ایک نئے سفر کا آغاز ہوگیا ہے اور میں پُرجوش ہوں کہ یہ مجھے کہاں لے جائے گا۔ خدا کرے کہ یہ راستہ میرے لیے ترقی، سیکھنے کا موقع، کامیابی اور خوشیاں لائے۔ آمین۔"ان کی حجاب میں تصاویر کے بعد سوشل میڈیا پر صارفین میں کشمکش پھیل گئی، کچھ نے ان سے سوال کیا کہ کیا وہ حج پر جا رہی ہیں، جبکہ دیگر نے ان کے نئے سفر کے لیے نیک خواہشات کا اظہار کیا۔
تاہم جویریہ سعود نے ایک اور پوسٹ کے ذریعے صارفین کی کنفیوژن دور کی اور وضاحت دی کہ ان کا نیا انداز دراصل ان کے آنے والے نئے ڈرامے کے لیے ہے۔ انہوں نے مداحوں کو بتایا کہ وہ جلد اپنے نئے کردار کے ساتھ واپس آ رہی ہیں، اور اس نئے سفر کے لیے تیار ہو جائیں۔جویریہ سعود کا یہ نیا قدم نہ صرف ان کے مداحوں کے لیے خوشی کا باعث ہے بلکہ یہ ان کی نئے پروجیکٹ کی جانب اشارہ بھی کر رہا ہے، جس کی تفصیلات ابھی تک سامنے نہیں آئیں۔
