فیفا ورلڈ کپ 2026 کے راؤنڈ آف 32 میں پرتگال اور کروشیا کے درمیان کھیلے گئے سنسنی خیز مقابلے کے بعد کرسٹیانو رونالڈو ایک بار پھر سوشل میڈیا پر موضوعِ بحث بن گئے۔
سوشل میڈیا پر وائرل ہونے والی ایک ویڈیو میں ایسا محسوس ہوتا ہے کہ پنالٹی لینے سے چند لمحے قبل رونالڈو نے آہستہ آواز میں "بسم اللہ" کہا۔ تاہم اس دعوے کی آزادانہ یا باضابطہ طور پر تصدیق نہیں ہو سکی۔یہ کلپ مختلف سوشل میڈیا پلیٹ فارمز پر تیزی سے شیئر کیا جا رہا ہے، جبکہ مداحوں کا کہنا ہے کہ پنالٹی لینے سے قبل رونالڈو خود سے کچھ الفاظ دہراتے ہوئے دکھائی دیے، جنہیں بعض صارفین نے "بسم اللہ" قرار دیا۔اس پنالٹی کی اہمیت صرف وائرل ویڈیو تک محدود نہیں رہی بلکہ یہ ورلڈ کپ کے ناک آؤٹ مرحلے میں رونالڈو کے کیریئر کا پہلا گول بھی ثابت ہوا۔یہ ٹورنامنٹ میں ان کا تیسرا گول تھا، جس نے پرتگال کو میچ میں واپس لانے میں اہم کردار ادا کیا۔واضح رہے کہ پرتگال نے کروشیا کو شکست دے کر راؤنڈ آف 16 میں جگہ بنا لی، جہاں اس کا مقابلہ اسپین سے ہوگا۔
