پرتگال کے عالمی شہرت یافتہ فٹبالر کرسٹیانو رونالڈو کی سعودی عرب سے محبت کے اظہار کی ویڈیو سوشل میڈیا پر وائرل ہوگئی، جس میں وہ سعودی قومی علامت کو بوسہ دیتے اور سعودی پرچم والا اسکارف پہنے نظر آئے۔
رونالڈو نے اپنے کیریئر کا 981واں گول اسکور کرتے ہوئے سعودی کلب النصر کو اے ایف سی چیمپئنز لیگ ایلیٹ میں ازبکستان کی ٹیم نیفتچی فرغانہ کے خلاف 1-3 سے کامیابی دلائی۔
سعودی قومی علامت کو بوسہ، شائقین کے ساتھ جشن
41 سالہ رونالڈو نے میچ سے قبل اپنی شرٹ پر موجود سعودی عرب کی قومی علامت کو بوسہ دیا، جس میں کھجور کا درخت اور دو تلواریں شامل ہیں۔ میچ کے اختتام پر انہوں نے سعودی پرچم والا اسکارف اپنے کندھوں پر ڈالا اور النصر کے شائقین کے ساتھ مشہور ’وائکنگ کلاپ‘ جشن میں بھی حصہ لیا۔
’میں پرتگالی ہوں، لیکن میرا تعلق سعودی عرب سے ہے‘
النصر نے اپنے عربی سوشل میڈیا اکاؤنٹ پر رونالڈو کی تصویر شیئر کرتے ہوئے پیغام لکھا: ’’میں پرتگالی ہوں، لیکن میرا تعلق مملکت سعودی عرب سے ہے۔‘‘
یہ الفاظ رونالڈو نے جون 2025 میں النصر کے ساتھ اپنے معاہدے میں توسیع کے بعد کہے تھے۔ ان کے حالیہ اندازِ اظہار کو بھی سوشل میڈیا صارفین کی توجہ حاصل ہوئی ہے۔
واضح رہے کہ رونالڈو اپنے کیریئر میں 1000 گول مکمل کرنے کے سنگِ میل کی جانب بڑھ رہے ہیں۔ فراہم کردہ اعداد و شمار کے مطابق، وہ اس ہدف سے صرف 19 گول دور ہیں۔
