پرتگال کے اسٹار فٹبالر کرسٹیانو رونالڈو اور فیفا کے صدر جیانی انفینٹینو کے درمیان پیرس میں ہونے والی مختصر ملاقات نے سوشل میڈیا پر ہنگامہ برپا کر دیا ہے۔
ای اسپورٹس ورلڈ کپ کے دوران دونوں کی ملاقات میں رونالڈو نے انفینٹینو سے گرمجوشی سے خیریت دریافت کی، جبکہ فیفا صدر نے ان کے ایک ہزار کیریئر گولز کے ہدف کی جانب رہنمائی کرتے ہوئے باقی 23 گولز کے لیے نیک خواہشات کا اظہار کیا۔ تاہم، ملاقات کے بعد رونالڈو کے چہرے کے تاثرات نے سب کی توجہ حاصل کر لی۔ جب وہ انفینٹینو سے بات کرکے آگے بڑھ رہے تھے، تو انہوں نے اچانک ایک غیر معمولی سا منہ بنایا جسے کیمرے نے قید کر لیا اور یہ ویڈیو سوشل میڈیا پر وائرل ہو گئی۔ کچھ صارفین نے رونالڈو کے تاثرات کو ناپسندیدگی سے جوڑا، جبکہ ان کا کہنا ہے کہ دونوں کے درمیان گفتگو کے دوران کسی اختلاف یا ناخوشگوار صورتحال کے آثار نظر نہیں آئے۔ یہ واضح نہیں کہ رونالڈو کا یہ ردعمل انفینٹینو سے متعلق تھا یا کسی اور بات یا سرگرمی پر، اس لیے صرف چہرے کے تاثرات سے کسی نتیجے پر پہنچنا مشکل ہے۔
