لاہور: وزیراعلیٰ پنجاب مریم نواز کی زیر صدارت لاہور ڈویلپمنٹ پلان کے حوالے سے ایک اہم اجلاس منعقد کیا گیا، جس میں لاہور شہر کی ترقیاتی سکیموں اور منصوبوں کی پیشرفت کا جائزہ لیا گیا۔
اجلاس میں سینئر صوبائی وزیر اور چیف سیکرٹری کو منصوبے کی بروقت تکمیل کے لیے واضح ٹاسک دیا گیا۔اجلاس میں لاہور ڈویلپمنٹ پلان کے مختلف حصوں پر تفصیل سے غور کیا گیا، اور پہلے فیز میں شامل مختلف پراجیکٹس کا مرحلہ وار جائزہ لیا گیا۔ وزیراعلیٰ مریم نواز نے منصوبے کے ترقیاتی کاموں کا تصویری معائنہ بھی کیا، تاکہ یہ یقینی بنایا جا سکے کہ کام بروقت اور معیار کے مطابق مکمل ہو رہا ہے۔
لاہور کی مختلف سڑکوں اور گلیوں کی تعمیر و بحالی کے لئے حتمی ڈیڈ لائنز بھی مقرر کی گئیں:
میونسپل کارپوریشن کی 3705 گلیوں کی تعمیر و بحالی کے لیے 30 جون تک کی حتمی تاریخ دی گئی۔
واسا کے زیر اہتمام 230 سٹریٹس کی تعمیر و بحالی کے لئے 30 جون کی ڈیڈ لائن مقرر کی گئی۔
واسا اور رکس کے لیے 1573 گلیوں کی تعمیر و مرمت کے لئے 31 جولائی کی آخری تاریخ رکھی گئی۔
پلان کے دوسرے فیز میں علامہ اقبال، عزیز بھٹی، اور واہگہ ٹاؤن کی گلیوں کی تعمیر و مرمت شامل ہے۔
وزیراعلیٰ مریم نواز نے اجلاس کے دوران کہا کہ:
"ترقیاتی سکیموں کی تکمیل میں تاخیر سے عوام کی روزمرہ زندگی متاثر ہوتی ہے، اور میں خود کو عوام کے سامنے جوابدہ سمجھتی ہوں۔ میں عوام کو مشکلات میں نہیں دیکھ سکتی۔"مریم نواز نے واضح کیا کہ وہ منصوبوں کی بروقت تکمیل کو یقینی بنانے کے لیے تمام ممکنہ اقدامات اٹھائیں گی اور ترقیاتی کاموں کی نگرانی کریں گی۔
