وزیراعلیٰ پنجاب مریم نواز نے متحدہ عرب امارات کے 53 ویں قومی دن کے موقع پر یو اے ای کے عوام کو مبارکباد پیش کرتے ہوئے کہا کہ یو اے ای دنیا بھر میں جدت اور ترقی کی قابل تقلید مثال ہے۔
اپنے بیان میں انہوں نے کہا کہ پاکستان اور یو اے ای کے تعلقات کئی دہائیوں پر محیط ہیں اور یو اے ای نے قدیم روایات کی پاسداری کرتے ہوئے ترقی کی بلندیاں چھوئی ہیں۔ مریم نواز نے کہا کہ پاکستان کی ورک فورس نے یو اے ای کی ترقی میں اہم کردار ادا کیا ہے اور دونوں ممالک کے عوام کے درمیان گہرے تعلقات ہیں۔وزیراعلیٰ پنجاب نے مزید کہا کہ یو اے ای مسلم دنیا کا ایک اہم ترین ملک ہے، جس نے ہر آزمائش کی گھڑی میں پاکستان کا پورا ساتھ دیا۔ انہوں نے یو اے ای کی اقتصادی اور سفارتی حمایت کو سراہا اور دعا کی کہ یو اے ای کی ترقی اور استحکام میں مزید اضافہ ہو۔مریم نواز نے اس بات پر بھی زور دیا کہ یو اے ای پاکستانیوں کا دوسرا گھر ہے اور دونوں ممالک کے عوام کے دل ایک ساتھ دھڑکتے ہیں۔
