فلپائن کی وزارت خارجہ نے اعلان کیا ہے کہ ایران نے یقین دلایا ہے کہ فلپائنی جھنڈے والے ایندھن بردار جہاز آبنائے ہرمز سے بلا روک ٹوک اور محفوظ طریقے سے گزرسکیں گے۔
میڈیا رپورٹس کے مطابق یہ یقین دہانی فلپائنی وزیر خارجہ ما تھریسا لازارو اور ایرانی ہم منصب عباس عراقچی کے درمیان توانائی کی محفوظ فراہمی کے حوالے سے ہونے والی بات چیت کے دوران سامنے آئی۔وزارت خارجہ کے بیان میں کہا گیا کہ ایرانی وزیر خارجہ نے فلپائنی جہازوں کی حفاظت کی ضمانت دی ہے، جس سے فلپائن کی توانائی کی ضروریات کو پورا کرنے میں آسانی ہوگی۔
لازارو نے ٹیلیفونک رابطے کو "پیداواری" قرار دیتے ہوئے کہا کہ اس بات چیت سے ایک مثبت تفہیم تک پہنچا گیا، جس سے سمندری مسافروں اور تیل کی سپلائی کی حفاظت یقینی بنائی جا سکے گی۔بیان میں مزید بتایا گیا کہ چونکہ فلپائن اپنی توانائی کی بڑی مقدار مشرق وسطیٰ سے درآمد کرتا ہے، اس لیے ایران کی یہ یقین دہانی ملک کے لیے اہم توانائی سپلائی میں تسلسل اور استحکام فراہم کرے گی۔
