رحیم یار خان میں ایک افسوسناک واقعہ پیش آیا جہاں پسند کی شادی کرنے والے جوڑے پر فائرنگ کی گئی۔
پولیس کے مطابق یہ واقعہ اس وقت پیش آیا جب چند مسلح افراد نے جوڑے کے گھر میں گھس کر اندھا دھند فائرنگ کر دی۔ فائرنگ کے نتیجے میں لڑکی موقع پر ہی جاں بحق ہوگئی جبکہ لڑکا شدید زخمی ہو گیا، جسے فوری طور پر اسپتال منتقل کیا گیا جہاں اس کی حالت تشویشناک بتائی جا رہی ہے۔تحقیقات میں سامنے آیا ہے کہ لڑکے اور لڑکی نے آٹھ ماہ قبل کراچی میں اپنی پسند سے شادی کی تھی، جس پر اہلِ خانہ ناخوش تھے۔ پولیس کا کہنا ہے کہ واقعہ ممکنہ طور پر "غیرت کے نام پر قتل" یا خاندانی رنجش کا شاخسانہ ہو سکتا ہے۔
ابتدائی رپورٹ کے مطابق مقتولہ کے گھر والوں کی جانب سے شدید دباؤ اور مخالفت کا سامنا تھا۔ پولیس ملزمان کی شناخت اور ان کے پس منظر کا پتہ لگانے کے لیے مزید چھان بین کر رہی ہے اور قریبی رشتہ داروں سے بھی تفتیش جاری ہے۔لاش کو پوسٹ مارٹم کے لیے اسپتال منتقل کر دیا گیا ہے جبکہ پولیس نے جائے وقوعہ سے شواہد اکٹھے کر کے مقدمہ درج کر لیا ہے۔
