پاکستانی قومی اسمبلی کے ارکان کی تنخواہوں میں حالیہ اضافہ کیا گیا ہے، جس کے بعد اب ہر رکن کی ماہانہ تنخواہ 5 لاکھ 19 ہزار روپے ہوگی۔
یہ اضافہ وفاقی سیکریٹری کی تنخواہ کو مدنظر رکھتے ہوئے کیا گیا ہے۔ذرائع کے مطابق، اسپیکر قومی اسمبلی ایاز صادق نے ایم این ایز کی تنخواہ میں اضافے کے حکم نامے پر دستخط کر دیے ہیں۔ اس فیصلے کا مقصد قومی اسمبلی کے اراکین کی تنخواہ اور مراعات کو وفاقی سیکریٹری کے برابر کرنا تھا، جس کے تحت ارکان پارلیمنٹ کو تمام کٹوتیوں کے بعد 5 لاکھ 19 ہزار روپے ماہانہ ملیں گے۔پارلیمانی ذرائع کا کہنا ہے کہ فنانس کمیٹی نے اس اضافے کی متفقہ منظوری دی تھی، اور اس کے مطابق ایم این ایز اور سینیٹرز کی تنخواہ و مراعات کو 5 لاکھ 19 ہزار روپے مقرر کر دیا گیا ہے۔ ارکان پارلیمنٹ نے پہلے 10 لاکھ روپے ماہانہ تنخواہ کا مطالبہ کیا تھا، تاہم اسپیکر ایاز صادق نے اس تجویز کو مسترد کرتے ہوئے 5 لاکھ 19 ہزار روپے کی تنخواہ کے اضافے کو حتمی شکل دی۔
اس اضافے سے ارکان کو نہ صرف بڑھا ہوا مالی فائدہ پہنچے گا بلکہ انہیں وفاقی سیکریٹری کے مساوی سہولتیں اور مراعات بھی فراہم کی جائیں گی۔
