چیئرمین سینیٹ سید یوسف رضا گیلانی نے نیشنل کونسل آف آسٹریا کے صدر ایچ ای والٹر روزن کرانز سے ملاقات کی، جس میں دونوں ممالک کے درمیان مختلف شعبوں میں تعاون بڑھانے کے امکانات پر گفتگو کی گئی۔
اس ملاقات میں سید نوید قمر، ملک محمد احمد خان، اور سید اویس قادر شاہ بھی موجود تھے۔ملاقات کے دوران چیئرمین سینیٹ نے روزن کرانز کو پاکستان کے دورے کی باضابطہ دعوت دی، اور آسٹریا کے کردار کو سراہتے ہوئے یو این سلامتی کونسل کے لیے پاکستان کی حمایت پر شکریہ ادا کیا۔ دونوں رہنماؤں نے اقتصادی اور تجارتی تعلقات کو مزید مستحکم کرنے کے عزم کا اعادہ کیا اور ان شعبوں میں مزید تعاون بڑھانے پر اتفاق کیا۔اس کے علاوہ، اعلیٰ تعلیم، ٹیکنالوجی، قابلِ تجدید توانائی، اور صنعتی ترقی کے شعبوں میں بھی باہمی تعاون بڑھانے کی ضرورت پر زور دیا گیا۔ ملاقات میں دونوں ممالک کے درمیان پارلیمانی سفارتکاری اور پالیسی کے تبادلے کو فروغ دینے کے لیے اقدامات کرنے پر بھی تبادلۂ خیال کیا گیا۔یہ ملاقات پاکستان اور آسٹریا کے درمیان موجودہ تعلقات کو مزید مضبوط بنانے اور دونوں ممالک کے درمیان تجارتی و اقتصادی تعلقات کو ایک نئی سمت دینے کی کوششوں کا حصہ تھی۔
