اسرائیل کے غزہ میں پولیس چوکیوں پر حملے، بچی سمیت 6 فلسطینی شہید

اسرائیلی فوجیوں نے مغربی کنارے میں امریکی نیوز چینل کی ٹیم کو حراست میں لے لیا
غزہ(آئی این پی )غزہ اور مقبوضہ مغربی کنارے میں ایران کے ساتھ جاری جنگ کے دوران بھی اسرائیلی حملے جاری رہے۔غزہ کے طبی حکام کے مطابق جنوبی خان یونس میں دو پولیس چوکیوں پر اسرائیلی فضائی حملوں کے نتیجے میں کم از کم چھ فلسطینی شہید ہو گئے جن میں ایک بچی بھی شامل ہے۔حکام کے مطابق جاں بحق افراد میں تین پولیس اہلکار اور تین شہری شامل ہیں جبکہ چار افراد زخمی بھی ہوئے ہیں، اس حملے کی اسرائیل کی جانب سے فوری طور پر تصدیق نہیں کی گئی۔رپورٹس کے مطابق گزشتہ نومبر میں امریکی ثالثی میں ہونے والی جنگ بندی کے بعد سے اب تک اسرائیلی کارروائیوں میں 692 فلسطینی شہید اور 1,895 زخمی ہو چکے ہیں۔دوسری جانب اسرائیلی فوجیوں نے مغربی کنارے میں امریکی نیوز چینل سی این این کی ٹیم کو حراست میں لے لیا۔ غیرملکی میڈیا رپورٹ کے مطابق سی این این کی ٹیم اسرائیلی قابضین کی جانب سے فلسطینیوں کی بستی گاں میں زمین پر زبردستی قبضے کے بعد کوریج میں مصروف تھی۔صحافیوں کے مطابق اسرائیلی فوجیوں نے ان پر تشدد کیا اور ایک امریکی نیوز چینل کے فوٹو جرنلسٹ کا گلا دبایا