ممبئی میں شوٹنگ کے دوران پیش آنے والے ایک افسوسناک حادثے کے بعد معروف بھارتی ہدایتکار ساجد خان کی سرجری کر دی گئی ہے۔
بھارتی میڈیا رپورٹس کے مطابق 55 سالہ ساجد خان ایکتا کپور کے ایک پراجیکٹ کے سیٹ پر موجود تھے کہ اس دوران ان کے پاؤں میں فریکچر ہو گیا، جس کے باعث فوری طور پر سرجری کی ضرورت پیش آئی۔ساجد خان کی بہن اور معروف فلم ساز و کوریوگرافر فرح خان نے بھارتی میڈیا سے گفتگو کرتے ہوئے تصدیق کی کہ 28 دسمبر کو ان کی سرجری کامیابی سے مکمل ہو گئی ہے۔
فرح خان کے مطابق ساجد خان کی طبیعت اب بہتر ہے اور وہ صحت یابی کی جانب گامزن ہیں۔
واضح رہے کہ ساجد خان طویل وقفے کے بعد بطور ہدایتکار فلمی دنیا میں واپسی کی تیاری کر رہے ہیں۔ ان کی آخری ہدایتکاری میں بننے والی فلم ’ہمشکلز‘ 2014 میں ریلیز ہوئی تھی۔ادھر مداحوں کی جانب سے ساجد خان کی جلد صحت یابی کے لیے نیک تمناؤں اور دعاؤں کا سلسلہ جاری ہے۔
