راولپنڈی: توشہ خانہ 2 کیس کی سماعت کے لیے عمران خان کی اہلیہ بشریٰ بی بی اڈیالہ جیل پہنچ گئیں۔
کیس کی سماعت اسپیشل جج سینٹرل شاہ رخ خان ارجمند کے روبرو ہو رہی ہے، جس میں پراسیکیوشن کی جانب سے مزید گواہوں کے بیانات ریکارڈ کرائے جائیں گے۔ سماعت میں بانی پاکستان تحریک انصاف (پی ٹی آئی) عمران خان کو بھی عدالت میں پیش کیا جائے گا، جبکہ بشریٰ بی بی پہلے ہی جیل پہنچ چکی ہیں تاکہ عدالت میں حاضری دے سکیں۔یہ کیس توشہ خانہ 2 کے حوالے سے چل رہا ہے، جس میں عمران خان اور بشریٰ بی بی پر الزامات ہیں کہ انہوں نے توشہ خانہ سے قیمتی تحائف غیر قانونی طور پر حاصل کیے۔
اب تک اس کیس میں دو گواہوں کے بیانات قلمبند ہو چکے ہیں، لیکن گزشتہ سماعت میں وکلائے صفائی کی عدم حاضری کے باعث کوئی کارروائی نہیں کی جا سکی تھی اور سماعت کو ملتوی کر دیا گیا تھا۔آج کی سماعت میں بشریٰ بی بی، بیرسٹر سلمان اکرم راجا اور پراسیکیوٹر ذوالفقار عباس نقوی اڈیالہ جیل پہنچ چکے ہیں۔ عدالت میں مزید قانونی کارروائی کی جائے گی اور کیس کے حوالے سے گواہوں کے بیانات مکمل کیے جائیں گے۔
