30 اور 29 اپریل کی درمیانی شب بھارتی فضائیہ کے چار رافیل طیاروں نے مقبوضہ جموں و کشمیر کی فضائی حدود میں گشت کیا۔
یہ کارروائی بھارتی فضائیہ کی جاری مشق "آکرمن" کا حصہ تھی، جس کا مقصد جنگی تیاریوں کو جانچنا اور ممکنہ حملہ آور مشن کی مشق کرنا ہے ۔پاکستانی فضائیہ نے بھارتی طیاروں کی موجودگی کا فوری نوٹس لیا اور اپنی فضائی نگرانی کو فعال کرتے ہوئے جوابی اقدامات کیے۔ سیکیورٹی ذرائع کے مطابق، پاکستانی فضائیہ کی مستعدی کے باعث بھارتی رافیل طیارے اپنی حدود میں واپس چلے گئے۔
یہ واقعہ ایسے وقت پیش آیا ہے جب 22 اپریل کو پاہلگام میں ہونے والے دہشت گرد حملے کے بعد بھارت اور پاکستان کے درمیان کشیدگی میں اضافہ ہوا ہے۔ بھارت نے اس حملے کا الزام پاکستان پر عائد کیا ہے، جسے پاکستان نے مسترد کرتے ہوئے غیر جانبدار تحقیقات کا مطالبہ کیا ہے ۔دونوں ممالک نے اس کشیدگی کے دوران مختلف اقدامات کیے ہیں، جن میں بھارت کی جانب سے سندھ طاس معاہدے کی معطلی اور پاکستان کی جانب سے بھارتی پروازوں کے لیے فضائی حدود کی بندش شامل ہیں ۔
