لاہور کی سیشن کورٹ میں شہباز شریف کے خلاف بانی پی ٹی آئی کے ہتک عزت کے دعوے کی سماعت کے دوران، اسپیکر پنجاب اسمبلی ملک محمد احمد خان نے اپنا بیان ریکارڈ کروا دیا ہے۔
ملک احمد خان نے کہا کہ بانی پی ٹی آئی نے شہباز شریف پر جھوٹے الزامات عائد کیے، جن میں رشوت لینے کا الزام شامل ہے، جو انہوں نے اپریل 2017 میں لگائے تھے اور مختلف چینلز پر نشر کیے گئے۔ انہوں نے مزید کہا کہ شہباز شریف نے بطور وزیراعلیٰ اور وزیراعظم عوامی خدمت انجام دی، اور ان الزامات سے گمراہ کن پروپیگنڈا کیا گیا۔انہوں نے یہ بھی بتایا کہ اسلام میں جھوٹ اور غیبت کی سخت ممانعت ہے، اور یہ کہ مدعی کا دعویٰ قانونی حق ہے۔ وکیل احمد حسین چوٹیاں نے سوال کیا کہ کیا یہ پروگرامز پنجاب سے آن ایئر نہیں ہوئے، جس پر ملک احمد خان نے کہا کہ یہ تمام پروگرام قومی نشریاتی اداروں پر چلتے ہیں، اور تمام پروگرامز پنجاب سے نشر نہیں ہوئے۔
اسپیکر نے مزید بتایا کہ پانامہ کیس سے متعلق انہیں علم نہیں ہے کہ بانی پی ٹی آئی نے سپریم کورٹ میں کوئی درخواست دی یا نہیں، لیکن انہوں نے تصدیق کی کہ نواز شریف کو پانامہ پیپرز میں سزا ہوئی تھی۔وکیل نے سوال کیا کہ کیا مدعی نے جھوٹا دعویٰ دائر کیا، جس پر اسپیکر نے جواب دیا کہ یہ غلط ہے۔سماعت کے بعد عدالت نے شہباز شریف کے مزید گواہوں کو آئندہ سماعت پر طلب کرتے ہوئے سماعت 13 دسمبر تک ملتوی کر دی ہے۔
