محکمہ موسمیات نے ملک کے مختلف شہروں میں بارش اور پہاڑوں پر برفباری کی پیشگوئی کی ہے، جب کہ لاہور میں موسم خوشگوار رہا ہے۔
لاہور کا موجودہ درجہ حرارت 11 ڈگری سینٹی گریڈ ریکارڈ کیا گیا ہے، اور شہر میں آئندہ 24 گھنٹوں کے دوران بارش کا کوئی امکان نہیں ہے۔ تاہم، ہوا کی نمی کا تناسب 75 فیصد اور ہوا کی رفتار 11 کلو میٹر فی گھنٹہ ریکارڈ کی گئی ہے۔ ایئر کوالٹی انڈیکس میں بہتری آئی ہے، اور فضائی آلودگی کی مجموعی شرح 173 ریکارڈ کی گئی ہے، لیکن لاہور آلودہ شہروں کی فہرست میں پانچویں نمبر پر آ گیا ہے۔محکمہ موسمیات کے مطابق، ملک کے بیشتر میدانی علاقوں میں موسم سرد اور خشک رہنے کی توقع ہے، مگر بالائی خیبر پختونخوا، گلگت بلتستان، کشمیر اور خطہ پوٹھوہار میں مطلع ابر آلود رہنے کے علاوہ تیز ہواؤں کے ساتھ بارش اور پہاڑوں پر برفباری کا امکان ہے۔ اسلام آباد اور اس کے گرد و نواح میں بھی موسم سرد اور ابر آلود رہے گا، اور ہلکی بارش کی پیشگوئی کی گئی ہے۔
مری، گلیات اور گرد و نواح میں بارش اور برفباری کا امکان ہے، اور راولپنڈی، اٹک، جہلم، چکوال میں تیز ہواؤں کے ساتھ ہلکی بارش کی توقع ہے۔خیبرپختونخوا کے بیشتر اضلاع میں بھی موسم سرد اور ابر آلود رہنے کی پیشگوئی ہے، اور دیر، چترال، کوہستان، مانسہرہ، ایبٹ آباد، ہری پور، بٹگرام، شانگلہ، بونیر، سوات، باجوڑ، خیبر، کوہات اور کرم میں تیز ہواؤں کے ساتھ بارش اور پہاڑوں پر برفباری کا امکان ہے۔سندھ اور بلوچستان کے بیشتر اضلاع میں موسم سرد اور خشک رہے گا، جبکہ شمالی بلوچستان میں شدید سرد اور جزوی ابر آلود موسم کی پیشگوئی کی گئی ہے۔ کشمیر اور گلگت بلتستان میں بھی مطلع ابر آلود رہنے کے ساتھ بارش اور برفباری کی توقع کی گئی ہے۔
