کراچی: ملائیشین ایئرلائنز کی کراچی کے لیے پروازیں جلد شروع ہونے کا امکان ہے۔
گورنر سندھ نہال ہاشمی سے ملائیشیا کے نو تعینات قونصل جنرل محمد یونس ابراہیم نے ملاقات کی، جس میں دونوں ممالک کے درمیان باہمی تجارت، سیاحتی اور ثقافتی روابط کو مزید فروغ دینے پر اتفاق ہوا۔ملاقات میں کہا گیا کہ پاکستان اور ملائیشیا کے تجارتی وفود کے تبادلوں کو بڑھایا جائے گا اور ملائیشین سیاحوں کے لیے پاکستان کے متعدد پرکشش سیاحتی مقامات سے آگاہی دی جائے گی۔ نہال ہاشمی نے زور دیا کہ دونوں ممالک کے فلم فیسٹیولز ثقافتی تعلقات کے فروغ میں اہم کردار ادا کریں گے، اور پاکستانی سرجیکل آلات کی دنیا بھر میں طلب کے پیش نظر اس شعبے میں تعاون کو بڑھانے کی ضرورت پر بھی بات چیت ہوئی۔
ملائیشیا کے قونصل جنرل نے جلد کراچی کے لیے ملائیشین ایئرلائنز کی پروازوں کے آغاز کا عندیہ دیا اور کہا کہ اکانومی ڈپلومیسی ان کی ترجیحات میں شامل ہے۔ انہوں نے مزید کہا کہ ٹیکنالوجی، الیکٹرک گاڑیاں اور سولر انرجی کے شعبوں میں سرمایہ کاری کو ترجیح دی جائے گی۔ اس ملاقات کے دوران دونوں فریقوں نے عوامی اور کاروباری روابط کو مستحکم بنانے پر اتفاق کیا۔
