خیبرپختونخوا حکومت نے سونے کی کان کنی پر عائد پابندی میں مزید 30 دن کی توسیع کردی ہے۔
اس فیصلے کا اعلان صوبائی محکمہ داخلہ کے جاری کردہ اعلامیے میں کیا گیا ہے۔ اعلامیے کے مطابق، دفعہ 144 کے تحت جاری اس پابندی کو اب 30 دن مزید برقرار رکھا جائے گا، تاکہ غیرقانونی کان کنی کے خلاف کارروائی کی جا سکے۔پابندی کا اطلاق خاص طور پر صوابی، نوشہرہ، کوہاٹ اور ملحقہ علاقوں میں ہوگا، جہاں دریائے سندھ اور دریائے کابل کے کناروں پر غیرقانونی کان کنی کا سلسلہ جاری ہے۔ محکمہ داخلہ کا کہنا ہے کہ غیرقانونی کان کنی سے دریا کے کناروں کو شدید نقصان پہنچ رہا ہے، جس سے ماحولیاتی مسائل جنم لے رہے ہیں۔ اس کے علاوہ، ان سرگرمیوں سے امن و امان کی صورتحال بھی متاثر ہو رہی ہے، مقامی تنازعات پیدا ہو رہے ہیں، اور اسمگلنگ کے امکانات بڑھ رہے ہیں۔اعلامیے میں یہ بھی بتایا گیا ہے کہ ضلعی انتظامیہ اور پولیس کو اختیار دیا گیا ہے کہ وہ سونے کی غیرقانونی کان کنی میں استعمال ہونے والی مشینری، گاڑیاں اور دیگر آلات کو ضبط کریں۔ اس اقدام کا مقصد غیرقانونی سرگرمیوں کو روکنا، ماحولیاتی تحفظ یقینی بنانا، اور امن و امان کی صورتحال کو بہتر بنانا ہے۔
