فیڈرل انویسٹی گیشن ایجنسی (ایف آئی اے) نے ویزا فراڈ اور انسانی اسمگلنگ کے معاملے میں 3 ملزمان کو گرفتار کیا ہے۔
ایف آئی اے انسداد انسانی اسمگلنگ اسلام آباد سرکل کے مطابق ایک ملزم کی شناخت زوہیب علی کے طور پر ہوئی ہے، جس پر الزام ہے کہ اس نے شہریوں کو بیرون ملک بھجوانے کا جھانسہ دے کر لاکھوں روپے ہتھیائے۔ملزم نے ایک شہری کو ترکی اور اس کے خاندان کے دیگر 5 افراد کو عمرہ کے لیے سعودی عرب بھجوانے کا وعدہ کیا تھا اور اس کے بدلے میں 12 لاکھ روپے سے زائد کی رقم وصول کی۔ اس کے علاوہ، ملزم نے ایک اور شہری سے بیرون ملک ملازمت کے وعدے پر 2 لاکھ 78 ہزار روپے ہتھیائے۔ یہ تمام رقم ملزم نے اپنے بینک اکاونٹ میں وصول کی تھی اور اس کے بعد روپوش ہو گیا تھا۔ایف آئی اے کے مطابق، ملزم ریکارڈ یافتہ ہے اور اس پر متعدد مقدمات درج ہیں۔ اسے گرفتار کر کے تفتیش کا آغاز کر دیا گیا ہے۔
اسی طرح، ایف آئی اے گجرانوالہ نے بھی 2 ملزمان عمران حیدر اور فرخ مشتاق کو گرفتار کیا ہے، جنہوں نے کامونکی سے ایک شہری کو کینیڈا بھجوانے کا جھانسہ دے کر اس سے 9 لاکھ روپے بٹورے تھے، مگر بیرون ملک بھجوانے میں ناکام ہو گئے۔ ملزمان سے مزید تفتیش جاری ہے تاکہ اس جرم میں ملوث دیگر افراد کا بھی پتہ چلایا جا سکے۔ایف آئی اے کا کہنا ہے کہ یہ کارروائیاں انسانی اسمگلنگ اور ویزا فراڈ کے خلاف جاری کوششوں کا حصہ ہیں تاکہ ایسے جرائم میں ملوث افراد کو سزا دلائی جا سکے اور عوام کو اس نوعیت کے فراڈ سے بچایا جا سکے۔
