وزیراعلیٰ سندھ سید مراد علی شاہ کو زخمی اونٹنی ’’چاندنی‘‘ کی میڈیکل رپورٹ موصول ہوگئی ہے، جو سیکریٹری لائیو اسٹاک کاظم جتوئی کی جانب سے ارسال کی گئی۔
آپریشن کی تفصیلات
اونٹنی ’’چاندنی‘‘ کا کامیاب آپریشن مکمل کیا گیا۔سرجری کے دوران جبڑے کی ہڈی کو درست کیا گیا جبکہ پچھلی دائیں ٹانگ کاٹنی پڑی۔یہ تین گھنٹے طویل سرجری ماہر ڈاکٹروں کی ٹیم نے بغیر خون بہائے مکمل کی۔سرجری کرنے والی ٹیم میں ڈاکٹر جاوید کھوسو، ڈاکٹر ذوالفقار اوٹھو اور ڈاکٹر علی گوپان شامل تھے۔
موجودہ حالت
سیکریٹری لائیو اسٹاک کے مطابق چاندنی اب خطرے سے باہر ہے اور ہوش میں آچکی ہے۔دو روز میں وہ خوراک لینے کے قابل ہوجائے گی جبکہ تین سے پانچ ہفتوں میں مکمل طور پر کھانے کے قابل ہوگی۔فی الحال میڈیکل ٹیم کی توجہ اس کی صحت یابی اور نگرانی پر مرکوز ہے۔
وزیراعلیٰ سندھ کی ہدایات
وزیراعلیٰ نے ہدایت دی ہے کہ اونٹنی کا بہترین علاج جاری رکھا جائے۔زخم مندمل ہونے کے بعد چاندنی کو مصنوعی ٹانگ لگانے کے لیے ماہرین کی خدمات حاصل کی جائیں۔
پس منظر
یاد رہے کہ سکھر کے علاقے روہڑی میں ایک بااثر وڈیرے نے مبینہ طور پر اپنے کھیت میں گھس کر پانی پینے والی اونٹنی کو تشدد کا نشانہ بنایا تھا۔اونٹنی کے مالک کے مطابق وڈیرے نے غصے میں اونٹنی کو ٹریکٹر سے باندھ کر گھسیٹا اور منہ پر ڈنڈے برسائے۔واقعہ منظر عام پر آنے کے بعد وزیراعلیٰ سندھ نے سخت نوٹس لیتے ہوئے فوری علاج کی ہدایت کی تھی۔
