پشاور: پی ٹی آئی رہنما شاندانہ گلزار نے پارٹی میں گروپ بندی کا انکشاف کر دیا
پی ٹی آئی کی رہنما شاندانہ گلزار نے اپنے بیان میں کہا ہے کہ پی ٹی آئی میں مختلف گروہ بن چکے ہیں اور صرف پارٹی کے بانی عمران خان کو ٹارگٹ کیا جا رہا ہے۔ عدالت میں کیس کی سماعت کے دوران میڈیا سے گفتگو کرتے ہوئے شاندانہ گلزار نے مزید کہا کہ اراکین اسمبلی کو وکلا سے لڑایا جا رہا ہے اور مخالفین اپنے مذموم ہتھکنڈوں میں کامیاب نہیں ہوں گے۔انہوں نے کہا کہ انہیں حال ہی میں پتہ چلا کہ عاطف خان اور وزیراعلیٰ کے درمیان بھی ایک گروپ ہے۔ شاندانہ گلزار نے اس بات کو بھی یاد دلایا کہ اسٹبلشمنٹ نے ذوالفقار علی بھٹو کی پارٹی کو توڑنے کی کوشش کی تھی جس کے نتیجے میں بھٹو کو پھانسی دی گئی۔
انہوں نے یہ بھی کہا کہ یہ تمام ہتھکنڈے پرانے ہیں اور ان کا کوئی اثر نہیں ہوگا۔مزید برآں، شاندانہ گلزار نے اپنی پارٹی کے بانی عمران خان کی رہائی کو اپنی اولین ترجیح قرار دیا اور کہا کہ پاکستان کے دشمن ملک کو تقسیم کرنے کی کوشش کر رہے ہیں۔قبل ازیں پشاور ہائیکورٹ میں شاندانہ گلزار کی حفاظتی ضمانت کی درخواست پر سماعت ہوئی، جس میں عدالت نے ان کی ضمانت میں 15 اپریل تک توسیع کر دی اور انہیں درج مقدمات میں گرفتار نہ کرنے کا حکم دیا۔ عدالت نے نیب سے رپورٹ بھی طلب کر لی۔
