واشنگٹن: امریکی صدر ڈونلڈ ٹرمپ نے یورپی ممالک کو خبردار کیا ہے کہ اگر یورپی یونین نے امریکی مصنوعات پر عائد محصولات میں کمی نہ کی اور تجارتی مذاکرات میں پیش رفت نہ ہوئی تو امریکا یورپی درآمدات پر 100 فیصد تک ٹیرف عائد کرنے پر غور کر سکتا ہے۔
میڈیا رپورٹس کے مطابق ٹرمپ کا یہ بیان امریکا اور یورپی یونین کے درمیان جاری تجارتی کشیدگی میں مزید اضافے کا عندیہ دے رہا ہے۔صدر ٹرمپ نے کہا کہ ان کی انتظامیہ کا مقصد امریکی صنعت، بالخصوص آٹوموبائل، اسٹیل، ایلومینیم اور زرعی شعبے کو غیر منصفانہ تجارتی پالیسیوں سے تحفظ فراہم کرنا ہے۔ ان کا کہنا تھا کہ اگر یورپی یونین نے امریکی برآمدات کے لیے اپنی منڈی مزید نہ کھولی تو امریکا سخت جوابی اقدامات کرے گا۔دوسری جانب یورپی یونین نے اس ممکنہ اقدام پر تشویش کا اظہار کرتے ہوئے کہا ہے کہ وہ مذاکرات کے ذریعے تجارتی تنازع کا حل چاہتی ہے، تاہم اگر امریکا نے یکطرفہ طور پر بھاری ٹیرف نافذ کیے تو یورپی یونین بھی امریکی مصنوعات پر جوابی محصولات عائد کر سکتی ہے۔
ماہرینِ معاشیات کے مطابق اگر امریکا نے یورپی مصنوعات پر 100 فیصد ٹیرف نافذ کیا تو دونوں خطوں کے درمیان تجارت شدید متاثر ہو سکتی ہے۔ اس کے نتیجے میں گاڑیوں، مشینری، شراب، لگژری اشیا اور دیگر درآمدی مصنوعات کی قیمتوں میں نمایاں اضافہ متوقع ہے۔تجزیہ کاروں کا کہنا ہے کہ اس ممکنہ تجارتی تنازع سے عالمی سپلائی چین، مالیاتی منڈیوں اور عالمی اقتصادی نمو پر بھی منفی اثرات مرتب ہو سکتے ہیں۔
