پاکستان کیخلاف ہتھیار اٹھانے والوں سے آہنی ہاتھوں نمٹا جائیگا، امریکہ میں کسی چین مخالف تقریب میں شرکت نہیں کی، مخالفین کی جانب سے پروپیگنڈا کیا جا رہا ہے :محسن نقوی

پاکستان کی مخالفت کریں امریکی ایوان نمائندگان کو اکسایا جارہا ہے وزیرداخلہ

سیاست کریں لیکن اس حد تک نہ جائیں  پاکستان کا نقصان ہو، کانگریس ارکان کے ساتھ ملاقاتیں بہت مثبت رہیں‘دونوں ممالک کے درمیان تعلقات کو مزید مضبوط کرنے کے لئے مختلف پہلوئوں پر بات چیت کی گئی
 دہشت گردی صرف پاکستان ہی نہیں سب کی مشترکہ لڑائی ہے، میرے امریکہ کے  دورے کا مقصد امریکی سیاست دانوں سے مل کر دہشت گردی کے خلاف موثر پلان بنانا ہے:ہیوسٹن میں میڈیا سے گفتگو
ہیوسٹن(آئی این پی‘مانیٹرنگ ڈیسک )وفاقی وزیر داخلہ محسن نقوی نے کہا ہے  پاکستان کے خلاف ہتھیار اٹھانے والوں سے آہنی ہاتھوں نمٹا جائے گا،  امریکا میں کسی بھی اینٹی چائنہ تقریب میں شرکت نہیں کی، مخالفین کی جانب سے زہریلا پروپیگنڈا کیا جا رہا ہے۔ان خیالات کااظہارانہوں نے دورہ امریکا کے موقع پر ہیوسٹن میں میڈیا سے گفتگو کرتے ہوئے کیا ۔ وفاقی وزیر داخلہ نے کہا   دہشتگردی صرف پاکستان ہی نہیں سب کی مشترکہ لڑائی ہے، میرے امریکا دورے کا مقصد امریکی سیاست دانوں سے مل کر دہشت گردی کے خلاف موثر پلان بنانا ہے۔انہوں نے کہا کہ پاکستان کے خلاف جو بھی ہتھیار اٹھائے گا اس سے آہنی ہاتھوں سے نمٹا جائے گا۔ انہوں نے کہا میں نے  چین کے خلاف کسی تقریب میں شرکت نہیں کی، مخالفین زہریلا پراپیگنڈہ کر رہے ہیں، نوجوانوں کی تقریب میں شرکت کی تھی، اس کو پراپیگنڈہ کر کے غلط رنگ دیا گیا، ایسے پروپیگنڈے سے کوئی فرق نہیں پڑتا، میں کسی بھی اینٹی چائنہ فنکشن میں نہیں گیا۔امریکہ کے ایوان نمائندگان کو پاکستان کے خلاف اکسایا جا رہا ہے، سیاست کریں لیکن اس حد تک نہ جائیں کہ پاکستان کا نقصان ہو، کانگریس اراکین کے ساتھ ملاقاتیں بہت مثبت رہیں۔  کانگریس اراکین کے ساتھ ملاقاتوں کو مثبت قرار دیتے ہوئے وزیر داخلہ نے کہا کہ دونوں ممالک کے درمیان تعلقات کو مزید مضبوط کرنے کے لیے مختلف پہلوں پر بات چیت کی گئی۔ انہوں نے زور دیا کہ پاکستان کے مسائل کے حل کے لیے عالمی برادری کا تعاون ضروری ہے۔