برطانیہ کے علاقے نارتھ یارکشائر میں پولیس نے 11 سال قبل قتل ہونے والی خاتون رانیا الاید کی باقیات برآمد کر لی ہیں۔
قتل اور تحقیقات کا پسِ منظر
رانیا الاید، جو 2013 میں اپنے شوہر احمد الخطیب کے ہاتھوں قتل ہوئی تھیں، تین بچوں کی والدہ تھیں۔ ان کی لاش کی تلاش گزشتہ کئی برسوں سے جاری تھی۔ تاہم، حالیہ تحقیقات کے دوران پولیس کو تھرسک کے قریب انسانی باقیات ملیں، جن کے بارے میں پولیس کو قوی یقین ہے کہ یہ رانیا الاید کی ہیں۔
بیٹے کا ردعمل
مقتولہ کے بیٹے یازان نے اپنی والدہ کی باقیات ملنے پر ردعمل دیتے ہوئے کہا:"11 سال بعد ماں کی باقیات کا ملنا ہمارے لیے ایک ناقابل یقین لمحہ ہے۔ ہم صرف اتنا چاہتے تھے کہ ان کی آخری رسومات ادا کر سکیں اور ان کی قبر پر کچھ پھول رکھ سکیں۔"
قاتل شوہر کو سزا
پولیس کے مطابق، مانچسٹر کے علاقے گارٹن سے تعلق رکھنے والے مقتولہ کے شوہر احمد الخطیب کو 2014 میں قتل کا مجرم قرار دے کر عمر قید کی سزا سنائی گئی تھی۔
رانیا الاید کون تھیں؟
رانیا الاید شامی نژاد خاتون تھیں۔وہ 15 سال کی عمر میں احمد الخطیب سے شادی کے بعد مشرقِ وسطیٰ سے فرار ہو کر انگلینڈ آئی تھیں۔شادی کے دوران انہیں شدید گھریلو تشدد کا سامنا تھا، جس کے باعث انہوں نے شوہر کو چھوڑ دیا تھا۔
پولیس کا بیان
پولیس کے مطابق، باقیات کی باضابطہ تصدیق ہونا ابھی باقی ہے، لیکن یہ دریافت رانیا الاید کے خاندان کے لیے ایک بڑی پیش رفت ہے، جو سالوں سے ان کی باقیات کی تلاش میں تھا۔
