تحریک انصاف کی سیاسی کمیٹی کے اجلاس کے بعد پارٹی کی جانب سے اہم اعلامیہ جاری کیا گیا ہے جس میں کئی اہم فیصلوں اور تحفظات کا اظہار کیا گیا ہے۔
اعلامیے کے مطابق سیاسی امور اور مستقبل کی حکمتِ عملی مزید مشاورت کے لیے سیاسی کمیٹی کے سپرد کردی گئی ہے۔ پارٹی نے مؤقف اپنایا ہے کہ کمیٹی کی مشاورت کے بعد اہم فیصلے سامنے لائے جائیں گے۔اعلامیے میں کہا گیا ہے کہ توشہ خانہ ٹرائل کی اڈیالہ جیل میں روزانہ سماعت پر گہری تشویش ہے، روزانہ سماعت سے ملزمان کے بنیادی حقوق متاثر ہوں گے اور یہ عمل انصاف کی فراہمی میں رکاوٹ بنے گا۔پی ٹی آئی نے 9 مئی کے مقدمات میں نااہل قرار دیے گئے اپنے ارکان کے حوالے سے کہا ہے کہ انہیں پارٹی اپنے حقیقی نمائندے سمجھتی ہے۔ اسی مؤقف کے تحت تحریک انصاف نے اعلان کیا ہے کہ نااہل ارکان کے حلقوں میں ہونے والے ضمنی انتخابات کا بائیکاٹ کیا جائے گا۔ پارٹی نے ناحق سزائیں پانے والے اپنے اراکین کو خراجِ تحسین بھی پیش کیا۔
اعلامیے میں مزید کہا گیا ہے کہ لاہور کے حلقہ این اے 129 میں انتخابی عمل میں حصہ لیا جائے گا۔ یہ نشست میاں اظہر کی وفات کے بعد خالی ہوئی تھی اور اس پر پی ٹی آئی امیدوار کھڑا کرنے کا فیصلہ کر چکی ہے۔پارٹی نے بانی پی ٹی آئی کی ہدایت پر اہم پارلیمانی اقدامات کا بھی اعلان کیا ہے۔ اس کے مطابق قومی اسمبلی کی پبلک اکاؤنٹس کمیٹی سے استعفے دینے کا فیصلہ کیا گیا ہے جبکہ اسٹینڈنگ کمیٹیوں کی چیئرمین شپ اور رکنیت سے بھی فوری استعفیٰ دینے کی ہدایت دی گئی ہے۔یوں سیاسی کمیٹی کے اجلاس میں نہ صرف عدالتی مقدمات پر تشویش کا اظہار کیا گیا بلکہ انتخابی حکمت عملی اور پارلیمانی پوزیشن کے حوالے سے بھی بڑے فیصلے سامنے آئے ہیں۔
