فلوریڈا، امریکہ: سائنس دانوں نے ایک غیر معمولی منظر ریکارڈ کیا، جب فلوریڈا میں برمی نسل کے ایک اژدھے نے ایک ہرن کو زندہ نگلنے کے بعد بغیر نقصان پہنچائے واپس اگل دیا۔
یہ مشاہدہ نومبر 2024 میں کیا گیا، جب ماہرین اژدھوں کی غذائی عادات پر تحقیق کر رہے تھے۔تحقیق جرنل ایکالوجی اینڈ ایوولوشن میں شائع ہوئی، جس میں بتایا گیا کہ یہ پہلا موقع تھا جب کسی برمی اژدھے کو ہرن کو نگلنے کے بعد واپس اگلتے ہوئے دیکھا گیا۔ یو ایس جیولوجیکل سروے کے بائیولوجسٹ مارک سینڈفوس نے کہا کہ اژدھے اکثر حیران کن اور غیر متوقع رویے ظاہر کرتے ہیں۔فلوریڈا میں برمی اژدھوں کی آبادی میں 1970ء کی دہائی کے بعد تیزی سے اضافہ ہوا ہے، جس کے نتیجے میں مقامی ہرنوں کی تعداد میں کمی واقع ہوئی ہے۔ تحقیق کے مطابق یہ اژدھے دیگر جانوروں کی خوراک میں بھی حصہ ڈال رہے ہیں، اور موقع ملنے پر ہرن یا مگرمچھ جیسے بڑے شکار کو بھی اپنے لچکدار جبڑوں کی مدد سے باآسانی نگل لیتے ہیں۔یہ حیران کن واقعہ حیاتیات کے ماہرین کے لیے نہایت دلچسپی کا باعث بنا، کیونکہ یہ اژدھوں کے شکار اور ہاضمہ کے رویے کے بارے میں نئی بصیرت فراہم کرتا ہے۔
