اسلام آباد: نائب وزیراعظم و وزیر خارجہ سینیٹر محمد اسحاق ڈار نے ترک وزیر خارجہ ہاکان فیدان سے ٹیلی فون پر گفتگو کی، جس میں انہوں نے حالیہ علاقائی پیش رفت کے حوالے سے تفصیلی تبادلہ خیال کیا۔
اس اہم رابطے کے دوران، اسحاق ڈار نے خطے میں جاری کشیدگی کو کم کرنے کے لیے پائیدار سفارتی کوششوں کی ضرورت پر زور دیا اور پاکستان کے امن و استحکام کے عزم کا اعادہ کیا۔ دونوں رہنماؤں نے مستقبل میں علاقائی حالات پر باہمی مشاورت جاری رکھنے اور قریبی رابطے میں رہنے پر اتفاق کیا، تاکہ امن و استحکام کے لیے مشترکہ کوششیں جاری رکھی جا سکیں۔
